Во време кога цената на енергентите урива рекорди, главно поради кризата предизвикана од геополитичките тензии и војната во Украина, граѓаните и компаниите се принудени да одвојуваат многу поголеми суми за да ги покријат трошоците за осветлување, затоплување, транспорт, производство итн.
Меѓународната агенција за енергија (МАЕ) објави неколку едноставни совети со кои на годишно ниво може да се заштедат и по неколку стотици евра.
Кога станува збор за затоплувањето на домовите и канцелариите, од агенцијата укажуваат дека со намалување на термостатот само за еден Целзиусов степен може да се заштедат 7 проценти од топлинската енергија и да се намали сметката за греење од 50 до 70 евра годишно.
Оттаму посочуваат дека вообичаено поставките за загревање на водата во бојлерите се наместени на повисоко ниво отколку што е потребно.
„Со нагодување водата да се загрева до 50 Целзиусови степени можете да заштедите до 8 проценти од топлинската енергија и да заштедите до 100 евра од просечната годишна сметка“, велат од МАЕ.
Од агенцијата додаваат дека енергија може да се заштеди и преку задржување на топлиот воздух во домот, односно просториите.
„Затворете ги вратите и прозорците, изолирајте ги цевките и затворете ги отворите низ кои има провев кај прозорците и оџаците, за да го задржите топлиот воздух во домот“, посочуваат од МАЕ.
Се препорачува и замена на старите светилки со нови ЛЕД-светилки и користење осветлување само кога е навистина потребно.
Кога станува збор за транспортот, од Меѓународна агенција за енергија укажуваат дека пешачењето и возењето велосипед се одлични алтернативи на возењето автомобил кога станува збор за кратки релации и дека на тој начин освен што може да се заштеди, се намалуваат штетните емисии на гасови во воздухот и метежот.
„За подалечни дестинации, каде што возењето велосипед или пешачењето се непрактични, користете јавен транспорт, бидејќи и на тој начин се намалува потрошувачката на енергија и се намалуваат загадувањето на воздухот и метежот“, велат од МАЕ.
Во однос на возењето автомобил, оттаму порачуваат да се вози со оптимални перформанси за да се намали потрошувачката на гориво.
„Возете побавно на патиштата, затворајте ги прозорците при поголеми брзини и осигурете се дека пневматиците се соодветно напумпани“, советуваат од МАЕ.
.webp){kind=icon}
