Министерството за финансии подготвува предлог-закони за изменување и дополнување на Законот за банките и на Законот за девизно работење. Во образложението на најавата за измените на Законот за банки објавена преку Единствениот национален електронски регистар на прописи (ЕНЕР) се вели дека Законот за платежни услуги и платни системи започнува со примена од 01 јануари 2023 година и дека потребно усогласување на Законот за банките, во делот на работењето на штедилниците.
„Со предложеното законско решение, ќе се овозможи и на штедилница да дава една или повеќе платежни услуги на физички лица од Република Северна Македонија, прифаќање платежни трансакции, отворање платежни сметки за платежни институции и институции за електронски пари, отворање посебни сметки на платежни институции и институции за електронски пари на кои се депонираат примените парични средства заради нивна заштита итн“, се вели во образложението.
Исто така, потребно е усогласување на Законот за девизно работење со Законот за платежни услуги и платни системи.
„Ќе се дефинира платежната институција, институцијата за електронски пари како и видовите на платежни трансакции со странство. Со измените се дава можност резидентите да извршуваат платежни трансакции со странство преку платежни сметки отворени кај платежни институции и институции за електронски пари. Платежните трансакции со странство, покрај банки, ќе можат да ги извршуваат и штедилници, платежни институции и институции за електронски пари“, се вели во објаснувањето.
.webp){kind=icon}
