Не се очекуваат нови поскапувања на туристичките аранжмани, вели Харис Меџедовиќ, менаџер за продажба во туристичката агенција „Фибула“.
„Цените за патување се зголемени не само за зимската сезона туку и преку целата година. Инфлација имаме во целиот свет. Цените за зимувањата во споредба со минатата сезона се за околу 20 проценти зголемени. Нови зголемувања на цените нема да има, немаме никакви најави, но за тоа е тука раното резервирање, со кое излегува за 20-30 проценти поевтино отколку ако се резервира кратко пред самото патување“, вели Харис Меџедовиќ од туристичката агенција „Фибула“ во разговор за емисијата „Зум ин“ на Блумберг Адрија ТВ.
Неговата агенција за зимскиот период работи со Бугарија, со зимските центри Банско, Пампорово и Боровец, како и со Србија, односно со зимските центри Копаоник и Златибор. Од друга страна, тој напоменува дека туристите во последните години во овој период од годината се привикнуваат да патуваат на топли дестинации и затоа нудат и топли дестинации како Дубаи, Малдиви, Сејшели, Маврициус и други.
„Зголемување на цените има секаде, но, од друга страна, има олеснување поради директните летови откај нас и регионот. Моментално најблиска дестинација за да стигнеме до Дубаи, на пример, се ОАЕ преку Софија или Тирана. Па, на странките им е полесно да стигнат до тие дестинации. Имаше директен лет од Скопје до Дубаи, но е прекинат. Добивме информација дека авиокомпанијата што оперираше планира во октомври идната година да ги врати летовите на таа линија, а тоа уште повеќе ќе ни ја олесни и нам работата и на туристите патувањето“, вели Меџедовиќ.
Тој зборува и за тоа како се справуваат со нелојалната конкуренција, што им создава проблем на сите туристички агенции, уривајќи ја стекнатата доверба од клиентите.
„Нелојална конкуренција има во секој бизнис, па, така, и во туризмот. Кога нелојална туристичка агенција ќе објави на својата интернет-страница или на социјалните мрежи нереална цена, странките нормално ги привлекува таа цена. Но кога ќе отпатуваат со таа агенција и нема да го добијат тоа што им е ветено, странките се разочаруваат и потоа и ние имаме негативен ефект. Но ние работиме напорно да им докажеме на клиентите дека ја заслужуваме нивната доверба и може да кажам дека 90 проценти од нашите клиенти доаѓаат повторно и повторно кај нас“, вели Меџедовиќ.
Целиот разговор со менаџерот за продажба на туристичката агенција „Фибула“, Харис Меџедовиќ, погледнете го во вториот дел од видеото.
.webp){kind=icon}
Во моментов нема коментари за веста. Биди прв да коментира...