Европската централна банка вчера одлучи да ги зголеми каматите за нови 50 базични поени. Одлуката што беше очекувана ја дигна стапката на депозити на 2,5 отсто, што е највисоко од 2008 година.
Повисоките камати на европскиот пазар на пари носат повисоки камати и за македонското задолжување. Веќе во вторник (7 февруари), државата ќе се задолжи за 27,5 милиони евра по нова, повисока камата.
На аукциите во вторник Министерството за финансии ќе понуди државни записи во вредност од близу 20 милиони евра, со рок на достасување од една година. Каматата за нив ќе изнесува 3,7 отсто и ова е прво зголемување по крајот на ноември. За една година, каматата на записите што ги емитува државата се зголеми за над три процентни поени. Лани во овој период се движеше од 0,4 до 0,6 отсто. Оваа стапка сега е највисока по февруари 2013 година.
Прочитај повеќе
Анализиравме точно каде и колку ќе се задолжи Македонија годинава
Владата неодамна ја усвоила Информацијата за продолжување на постапката за потенцијално задолжување на меѓународниот пазар.
24.01.2023
Почитувани, каматата ви се зголеми баеги
Забележителен раст има кај новите кредити и депозити.
27.01.2023
Раст на каматите на вкупните кредити и депозити
Просечната каматна стапка на новоодобрените кредити во декември, е зголемена за 0,34 п.п. на месечно ниво и изнесува 4,83 проценти
31.01.2023
Остатокот од задолжувањето што ќе се реализира идната недела се државни обврзници со рок на достасување од 15 години. Каматата за нив ќе изнесува 5,6 отсто, што е исто така прво зголемување по пауза од близу два месеца. Кај овој инструмент каматната стапка во јануари 2022 година изнесувала само 0,9 отсто. И оваа стапка е највисока во последните десет години.
Во меѓувреме, драстично поскапе и задолжувањето на државата на домашниот пазар по одлуките на Народната банка да ја зголеми каматата за благајничките записи. Таа лани ова време изнесуваше 1,25 отсто, а сега 4,75 отсто. Последната аукција на благајнички записи се одржа на 18 јануари, записите беа со рок на достасување од 28 дена. Каматата на благајничките записи сега е највисока по 2010 година.
Трендот на зголемување на каматите за државните задолжувања ќе продолжи и во следниот период. Тоа е јасно по вчерашното предупредување од страна на ЕЦБ дека најагресивниот период на монетарното затегнување во историјата не е завршен - дури и кога цените на енергијата паѓаат и Федералните резерви го ублажуваат темпото на сопствените покачувања.
„Управниот совет има намера да ги зголеми каматните стапки уште за 50 базични поени на следниот состанок за монетарната политика во март“, се вели во соопштението на ЕЦБ. „Потоа ќе го оцени натамошниот пат на својата монетарна политика“.
.webp){kind=icon}
