Компаниите бројат загуби поради штрајкот во железницата. На железничките станици низ Балканот е заглавено полумесечното производство на компанијата „Макстил“, која е една од засегнатите фирми со штрајкот на железничарите, кои веќе неколку дена ги запреа возовите и бараат подобри услови за работа.
„Дури 50 отсто од производството на месечно ниво е блокирано по железничките станици на Балканот. Заглавени се 14 воза со суровина во Бугарија и Србија. Стојат околу 8 илјади тони што како лимови треба да се испорачаат до нашите крајни купувачи“, вели Петар Јанески, директор на економика во „Макстил“, во интервју за „Блумберг Адрија“.
Јанески додава дека е крајно време Владата да го растури монополот во железницата.
„Да се приватизира тој сектор, како што работат во цела Европа. Вака, оставени сме во немилост на одлуките, кои многу често се и политички мотивирани“, вели Јанески.
„Полумесечното производство не може да се испорача кон крајните купувачи, а имаме рокови што треба да ги испочитуваме“, нагласува тој и додава дека како компанија се борат на отворениот европски пазар, но ако не може да бидат прецизни во роковите, тоа ќе значи губење клиенти, што, пак, ќе доведе до ситуација да бидат принудени да работат локално, во лимитран опсег на производствена програма.
Според Јанески, за жал, честите застои во железницата продолжуваат изминативе години и речиси на секои два месеца има прекин во железничкиот сообраќајот. „Макстил“ како компанија е директно засегната од ваквите застои, кои значат прекин во дистрибуцијата на нејзиниот производ. Тој вели дека тие не може да имаат алтернатива во однос на транспортот на нивните производи поради количествата и габаритот на производот.
Целиот разговор со Петар Јанески погледнете го во видеото во рамките на објавата.
.webp){kind=icon}