Со субвенции од Владата, германската авиокомпанија „Луфтханза“ (Lufthansa) ќе воведе една нова авиолинија - од Скопје до Франкфурт, а „Визер“ (Wizz Air) четири - од Скопје до Луксембург, Штутгард, Салцбург и до Љубљана.
Премиерот Димитар Ковачевски и министерот за транспорт и врски Благоја Бочварски на прес-конференција објавија дека е успешен повикот за субвенции за нови авиолинии што заврши на 31 март и оти е склучен договор со „Луфтханза“ и „Визер“.
„Луфтханза“ ќе лета од Скопје до Франкфурт од 23 април десет пати неделно, а „Визер“ кон новите четири дестинации трипати неделно од 1 ноември годинава. Финансиската поддршка ќе изнесува седум евра во денарска противвредност по патник во заминување, превезен од Меѓународниот аеродром Скопје.
„Со 'Луфтханза' преку Франкфурт се поврзуваме со повеќе од 200 дестинации. Преку субвенционирање авиолинии овозможуваме раст на економијата и на авиосообраќајот“, рече Ковачевски на прес-конференција во Владата.
Бочварски истакна дека се воведени нови дестинации за кои имало голем интерес од граѓаните.
„Има дополнителни средства да се објави нов повик кон крајот на годината, со цел да се привлечат нови дестинации“, најави министерот.
Министерството за транспорт и врски во својот буџет годинава има предвидено 1,1 милион евра за оваа намена, а вкупно пет милиони евра за тригодишната програма.
.webp){kind=icon}