Поддршка во финансирањето на трошоците за унапредување на производствениот процес, инвестиции во нови обновливи извори на енергија и одржување на веќе изградените централи од обновливи извори е целта на заемот вреден 100 милиони евра што го обезбеди Европската банка за обнова и развој (ЕБОР) за АД ЕСМ.
Договорот за заемот беше потпишан денеска во Министерството за финансии.
Заемот е со рок на отплата од пет години, со грејс-период од шест месеци и со варијабилна каматна стапка на шестмесечен Еурибор со маргина од еден отсто. Компанијата ќе биде корисник на средствата и ќе ги сервисира сите обврски, а државата ќе дава гаранција.
Како што истакна министерот за финансии Фатмир Бесими, пред потпишувањето на договорот, Владата со ова уште еднаш покажува дека има сериозен пристап во справувањето со енергетската криза.
„Денес се обезбедуваат дополнителни 100 милиони евра, поддршка за ЕСМ. Се олеснува состојбата зашто 100 милиони евра нема потреба да се дадат од буџетот“, рече Бесими.
Тој потсети дека од 2020 до 2022 година Владата реагирала брзо за справување со кризите и одвоила околу две милијарди евра. Во 2023 година, пак, нагласи Бесими, за поддршка на граѓаните и стопанството се предвидени 225 милиони евра.
„Овие 100 милиони евра од ЕБОР се плус планираните 225 милиони“, потенцира Бесими.
Според директорот на ЕСМ, Васко Стефанов, кој се заблагодари за поддршката од ЕБОР, АД ЕСМ продолжува да се движи кон зеленото сценарио.
„Планирани се повеќе проекти што сериозно ќе влијаат земјава да биде енергетски независна. Поддршката и соработката со институции како ЕБОР се од клучно значење и ќе придонесат за побрза и полесна транзиција кон зелената агенда, со заложба за транзиција кон чиста енергија, чија цел е намалување на стакленичките гасови за 61 процент“, потенцира Стефанов.
Освен договорот за заем, во Министерството за финансии беше потпишан и договор за гаранција меѓу Република Северна Македонија и ЕБОР.
На потпишувањето на договорите присуствуваа министерот Бесими, директорката на ЕБОР за Југоисточна Европа, Шарлот Руе, и директорот на ЕСМ, Стефанов.
.webp){kind=icon}
