Туризмот во земјава закрепнува од пандемијата и капацитетите на туристичките места во екот на сезоната се полни. Бројот на домашни и странски туристи во првата половина од годинава е зголемен за 30,1 отсто споредено со лани. Кај домашните туристи има раст од 2,8 отсто, додека кај странските 46,8 отсто.
Охрид, Струга и Скопје го билдаат македонскиот туризам
Најпосетени региони во изминатиот период се Скопскиот и Југозападниот, каде што се наоѓа Охридско Езеро. За шест месеци, Скопје го посетиле 150.000 странски туристи, главно преку редовно организираните странски тури за прошетка, додека во Југозападниот Регион бројот на туристи изнесува близу 140.000. Во преостанатите региони максималниот број на туристи е 30.000.
Од вкупниот број на туристи, 42,3 отсто се одлучиле времето да го поминат на езерските места, 36,4 отсто да го посетат Скопје, а само четири отсто се одлучиле да се рекреираат на планинските места.
Државјаните на Турција и на Србија се најмногубројни туристи, а по нив следуваат жителите на Полска и на Холандија.
Еколошкиот и руралниот туризам се иднината
Време е да се следат светските трендови во туризмот и, покрај езерскиот туризам, во летната сезона да се развиваат и еколошкиот и руралниот туризам. Луѓето сè повеќе се одлучуваат за екотуризам, патување во природни области што ја штитат животната средина. Македонија изобилува со такви дестинации за патување, но тие не се во фокусот на туристичката промоција на земјата.
„За да се најдат овие локации на мапата на дестинации во земјава е потребна долгорочна стратегија“, вели директорот на Агенцијата за поддршка и промоција на туризмот, Љупчо Јаневски. „Можеби во одредени општини туризмот не се перципира и не се третира на нивото на кое треба да биде, односно неговата моќност не може да се види во овој момент и покрај тоа што општините сè повеќе се фокусирани на развојот на туристичкиот сектор. Тоа пред сè се однесува на развојот на руралниот и екотуризмот, за кој сметам дека е иднината на македонскиот туристички сектор“, истакнува Јаневски.
За привлекување туристи што ги следат новите трендови на патување, Агенцијата неодамна објави илустрирана гастрономска карта, која има цел да ги мапира регионите во кои има традиционално приготвени македонски јадења.
Агенција за промоција и поддршка на туризам
Очекувањата се дека оваа година туристичката сезона ќе ги надмине бројките од пред пандемијата. Засега, според податоците на Државниот завод за статистика, бројот на туристи во првите шест месеци е помал во споредба со истиот период во 2019 година.
.webp){kind=icon}
