12 септември 2023, 14:42
Извозот во вториот квартал бележи значителен пад
Минусот се поклопува со кризата во Германија
Позитивен тренд има кај финалната потрошувачка
Depositphotos
Бруто-домашниот производ (БДП) во вториот квартал од оваа година порасна само за 1,1 отсто. Ова е забавување на економијата во однос на претходниот квартал, кога БДП забележа раст од 2,1 отсто, објави Државниот завод за статистика.
Значителен пад бележи и трошењето на државата. Јавната потрошувачка во периодот од април до јуни се намали за 2,7 отсто. Сепак, оваа бројка е подобра во однос на периодот јануари – март, кога трошењето на државата беше во минус од 5,9 отсто.
Во минус се бруто инвестициите (-1,2 отсто), но состојбата овде е значително подобрена во однос на претходното тримесечје, кога падот изнесуваше 22,3 отсто.
Во второто тримесечје во негатива влезе извозот (-1,2 отсто), а тоа е значителен пад затоа што во првиот квартал извозот бележеше раст од 7,1 отсто. Ова е прв негативен резултат на извозот на земјата и се поклопува со стагнацијата на германската економија, каде што завршува најголемиот дел од македонскиот извоз.
Во негатива е и увозот (-1,7 отсто), што е подобрување во однос на претходните три месеци (-4,3). Негативниот тренд кај увозот почна минатата година, но во текот на 2023 година бројките за првпат се негативни.