Откако Белата куќа објави слика на Трамп во папска облека, кардиналите во Ватикан избраа Американец за папа. Кардиналот Роберт Францис Превост е новиот поглавар на Католичката црква и прв државјанин на САД што ја презема оваа улога. Тој ќе го носи името Лав Четиринаесетти. Претпоставките се дека има добар потенцијал да биде посредник со Доналд Трамп, но можно е да дојде до судири околу политиките за миграција.
Во седмицата што ја обележи изборот на папата, ние анализиравме кои компании покажуваат усогласеност со библиските вредности и имаат позитивно општествено влијание. Од земјава само „Комерцијална банка“ АД Скопје има оценка за усогласеност со верските стандарди. Притоа, оценката на компанијата е средна, но позитивна.
Прочитајте повеќе:
На плажа во Грција или по патот на Инките - каде на одмор годинава?
Како измислен лик од Македонија заврши во „Симпсонови“?
Не помалку важни се уште два настана што ја обележија неделата. Првиот, Ворен Бафет по шест децении на чело на „Беркшир Хатавеј“ и на 94-годишна возраст реши да се пензионира. Вториот, шокантниот избор на новиот германски канцелар. Фридрих Мерц не беше избран на првото гласање. Тоа е преседан во германската историја и навестување на тешки политички времиња во најголемата европска економија.
Какви ќе бидат импликациите за Германија и ЕУ од трговската војна што ја наметна американскиот претседател Трамп, сè уште се проценува. ЕЦБ предупредува на забавување на растот, но нарачките во германските компании пред стапувањето во сила на царините растат, а главниот германски индекс урива рекорди.
Пролет го зафати и Волстрит. По турбуленциите што ги предизвикаа изјавите на Трамп во претходниот период, сега берзите се во зелено. Откако беше објавено дека е постигнат договор меѓу САД и Обединетото Кралство за царините, а дека викендов во Швајцарија ќе продолжат преговорите со Кина, индексите пораснаа. И биткоинот повторно надмина 100.000 долари.
Фед и неделава ги задржа каматите на исто ниво. Трамп продолжи со навредите кон Пауел, а тој изјави дека нема да избрзуваат со одлуките и сè зависи од Белата куќа.
Прочитајте повеќе:
Европските акции се држат подобро од американските во 2025 година
Време на дивиденди: Кои акционери ќе се насмевнат, а кои ќе бидат поднамуртени?
Во земјава инфлацијата во април изнесуваше 2,6 отсто. Власта и овој пат не ја пропушти шансата да се пофали дека овој процент, кој е блиску до целта од 2 отсто, е резултат на нејзините политики за грижа за стандардот на граѓаните. Податокот за инфлацијата е за периодот кога важеа владините мерки, ние анализираме што се случи со цените по тоа.
„Евростат“ објави дека македонските домаќинства користат најскап гас во Европа, а државата го потпиша договорот за изградба на интерконекторот за гас со Грција. Експертите уште еднаш предупредија дека се нужни поголеми инвестиции во енергетскиот сектор.
Пишувавме и за новата медицинска опрема за која се потрошени милиони, а собира прашина, додека граѓаните голтаат таблети како да се бонбони.
Вештачката интелигенција останува во нашиот фокус. Анализиравме зошто е толку тешко да се измери влијанието на вештачката интелигенција врз продуктивноста. Пишувавме и за маркетарите што на големо користат ВИ, но креативноста на човечкиот мозок за клучните задачи е супериорна.
Го одбележивме и Денот на Европа или Денот на победата над фашизмот. Некогашните сојузници одамна не слават заедно, а ние проверивме кој ја присвојува победата над нацизмот.
.webp){kind=icon}
