Крајот на годината е важен поради две работи. Глобално почнува сезоната на попусти. Локално, за најголем дел од вработените ќе стигне и К-15, кој годинава ќе изнесува 300 евра, затоа и ве советуваме како да купувате попаметно.
Неделава, конечно, Министерството за финансии објави дека за купување прв стан ДДВ ќе остане 5 отсто и по Нова година, а го официјализира и новото задолжување кај населението со граѓанска обврзница.
Прашавме дали би купиле електричен автомобил и констатиравме дека Македонците сѐ уште повеќе сакаат „да го слушаат моторот“, а анализата на лизинг-индустријата ни покажа дека 40 отсто од сите нови автомобили во земјава се финансирани со лизинг.
Прочитајте повеќе:
Дали македонска банка би дала кредит на 50 години? Трамповите идеи низ наши бројки
Каде во светот најдобро се вртат парите на пензионерите - Македонија некаде на средината
Неделава македонската „НЛБ банка“ го прослави 40-от роденден со голема конференција. Банката ги образложи досегашните резултати и визијата за иднината, која, секако, ќе биде обликувана од вештачката интелигенција.
Вештачката интелигенција го обликува и работењето на цементарницата од Кисела Вода, „Титан Ујсе“. Од менаџментот за „Блумберг Адрија“ рекоа дека ја зголемиле ефикасноста со помош на сопствените ВИ-алатки.
Вградена вештачка интелигенција има во очилата што ги лансираше „Алибаба“, а ВИ-апликацијата на оваа компанија бележи силен старт во трката со ЧетГПТ.
И „Гугл“ подготвува нов предизвик со ВИ-чипови, што беше причина да паднат акциите на „Енвидија“ затоа што сега веќе растат сомнежите за нејзината доминација во светот на вештачката интелигенција.
На глобалните пазари продолжи падот и на другите акции, меѓу кои и оние на „Рајнметал“. Ги прашавме аналитичарите кои се ризиците за следниот период откако ЕЦБ процени дека инфлацијата веќе не е најголемиот проблем. Проблеми за семејството Трамп носи и падот на криптото.
Она што расте во вакви турбулентни времиња се заработката на здравствениот сектор и цената на златото поради оптимизмот дека Фед уште еднаш ќе ги намали каматите.
Прочитајте повеќе:
Тивките сигнали на прегорување: Зошто лидерите мора да реагираат навреме
Неисполнети ветувања: Посиве зелената агенда во регионот
Неделата ја обележија две трагедии. Првата во Хонгконг, каде што во пожар во станбен комплекс загинаа над 120 лица. Втората во Вашингтон, каде што Авганистанец пукаше кон војници, по што Трамп најави ригорозна контрола на дојденците. Откако една од повредените почина од добиените повреди, Трамп трајно ја стави на „пауза“ миграцијата од земјите од Третиот Свет.
Преговорите за завршување на најсмртоносните војна во Европа по Втората светска војна продолжуваат со сите контроверзии. „Блумберг“ објави транскрипции од разговори од кои е јасно дека Виткоф ја советувал Русија за планот за Украина. А анализиравме и што значи тој план за Трамп. На пазарите, додека траат преговорите цената на нафтата мирува, а гасот поевтинува, а во потрага по решение за санкционираните руски рафинерии, Орбан се сретна со Путин.
.webp){kind=icon}
