Прашавме колку македонски возачи би се префрлиле на електричен автомобил

Само 25 проценти од македонските возачи би се префрлиле на целосно електричен автомобил, 23 проценти би го сториле тоа во зависност од развојот на инфраструктурата, а преостанатите 52 проценти воопшто не би се префрлиле на возила со електричен погон. Ова се резултатите од анкетата што ја спроведе „Блумберг Адрија“ на Линкдин во текот на два работни дена во изминатата недела.

Тие покажуваат дека македонските возачи размислуваат приближно исто како и германските во однос на ова прашање. Имено, Германскиот автомобилски клуб (АДАК) неодамна пренесе истражување според кое околу една третина од германските возачи планираат да се префрлат на целосно електрично возило.

„Сепак, бројот на нови регистрации на електрични возила заостанува малку зад него, на нешто помалку од 20 проценти“, наведуваат во АДАК.

Кога станува збор за Македонија, „Блумберг Адрија“ во повеќе наврати пишуваше дека во изминативе години има раст на бројот на електрични автомобили, но дека сепак тој е незначителен во однос на вкупниот број возила. Имено, заклучно со 2024 година, од вкупно 580.210 регистрирани автомобили, само 1.507 биле со целосен погон на електрична енергија, а имало 5.078 хибридни автомобили.

Исто така пишувавме дека во периодот од јануари до јуни годинава во земјава биле увезени вкупно 34.587 патнички возила, а од нив само 202 се електрични.

Главниот проблем за слабата продажба на електричните возила веќе не е цената. Разликата меѓу возилата на погон со внатрешно согорување и електрични возила се намали, а во некои случаи дури и се изедначи. На македонскиот пазар најевтините модели на електрични возила чинат околу 22.000 евра, а теренските возила од 36.000 евра нагоре. Многу поголем проблем е инфраструктурата односно недостигот од полначи.

Кои се најдобрите електрични автомобили во различни класи според АДАК?

За да им помогне на возачите со нивните одлуки за купување, во АДАК ги тестирале сите релевантни нови модели. Опфатени се околу 90 електрични возила, од мали автомобили до луксузни седани. Рангирањето е сортирано по класи односно по резултати од тестовите на автомобилот. Оценката цена-перформанси покажува колку добивате за вашите пари.

Победник во класата микро и мали автомобили е „мини ајсмен“ (Mini Aceman). Од АДАК велат дека меѓу предностите на ова возило се моќниот и економичен погонски склоп што нуди безбедно и агилно управување, добриот квалитет на изработка, лесното управување и сеопфатната стандардна опрема во однос на мултимедијата и помошта на возачот. Како слабости ги наведуваат ограничениот опсег и минималната удобност на суспензијата.

На првото место во категоријата ниска средна класа е „шкода елрок“ (Škoda Elroq). Како предности на ова возило се посочуваат моќниот мотор, одличната удобност при суспензија, просторот во внатрешноста, добрата соодветност за детско седиште и малата потрошувачка. Како слабости се наведени недостигот од рамен под за товарење по склопување на задните седишта и непрактичните лизгачи на допир.

Победник во средната класа е „шкода енијак“. Високата безбедност, просторот во внатрешноста, високиот комфор при возењето и суспензијата и добриот опсег се предностите на ова возило според АДАК. Како слабости се посочуваат високата цена, малиот капацитет за влечење и умерената носивост.

На првото место во категоријата висока средна/висока класа е „фолксваген ИД7“ (VW ID.7). Меѓу предностите на овој автомобил, според АДАК, се квалитетот на материјалот и изработката, просторноста, удобноста при возење, безбедноста, перформансите при возење и соодносот потрошувачка/досег. Како слабости се наведени куповната цена, капацитетот за влечење и носивоста.