Уриваме рекорди: Над 53 милиони евра за лекови на рецепт лани во Македонија

Вкупно 26.150.147 рецепти во износ од 3,27 милијарди денари (53,1 милиони евра) биле реализирани лани во Македонија на товар на Фондот за здравствено осигурување, покажуваат податоците од годишниот извештај за работењето на оваа институција во 2024 година. Во него се констатира дека потрошувачката на лекови на рецепт на товар на Фондот за здравствено осигурување преку аптеките бележи континуиран раст во изминатите години. Имено, во споредба со претходната година во 2024 година бројот на рецепти е зголемен за околу 3,2 проценти, а вкупниот фактуриран износ за 9,7 проценти. Просечната потрошувачка на лекови според бројот на реализирани рецепти по осигуреник 2024 година е 14,2 рецепти, што претставува зголемување од околу 4 проценти во однос на 2023 година.

Намалување на рецептите само во Скопскиот регион

Во 2024 година, во сите региони се забележува зголемување на просечниот број на реализирани рецепти по осигуреник во однос на 2023 година, освен во Скопскиот регион каде се бележи намалување за 2 проценти. Најголема потрошувачка на лекови според бројот на реализирани рецепти по осигуреник, а соодветно на тоа и според просечниот износ по осигуреник, е забележана во Источниот регион со 17,3 рецепти по осигуреник, со просечен износ од 2.072 денари. Најмала потрошувачка на лекови според бројот на реализирани рецепти по осигуреник е забележана во Полошкиот регион со 11,5 рецепти по осигуреник. Просечниот фактуриран износ по осигуреник за 2024 година на ниво на државата изнесува 1.778 денари.

За какви болести најчесто користиме лекови?

Како и во изминатите години, и во 2024 година на прво место по бројот на реализирани рецепти и според вкупниот фактуриран износ се лековите за третман на заболувања на кардиоваскуларниот систем. Во 2024 се бележи пораст на бројот на реализирани рецепти за лековите од оваа група и тоа за 2,6 проценти, додека пак вкупниот фактуриран износ е зголемен за околу 13,6 проценти. Во 2024 година се реализирани околу 10,49 милиони рецепти во износ од 857 милиони денари (13,9 милиони евра).

На второ место, според бројот на реализирани рецепти, во 2024 година се лековите со дејство на дигестивниот тракт и метаболизмот. Додека според вкупните фактурирани износи на второ место се лековите кои делуваат на респираторниот систем.

Лековите со дејство на централниот нервен систем се на трето место според бројот на реализирани рецепти, а лековите со дејство на дигестивниот тракт и метаболизмот според вкупниот фактуриран износ. Потрошувачката на антиинфективните лекови (антибиотици, антимикотици, антивирусни лекови), кои се наоѓаат на четврто место според бројот на реализирани рецепти, во 2024 година е намален за 1,9 проценти во однос на 2023 година.

Кои лекови на рецепт се најкористени?

Најкористен лек во 2024 година е лекот „метформин“ (metformin) со приближно 1,96 милиони реализирани рецепти. Овој лек учествува со 7,5 проценти во вкупно реализираните рецепти во 2024 година, а спаѓа во групата на лекови со дејство на дигестивниот тракт и метаболизам и се користи при дијабетес. На второто место е лекот „еналаприл“, а на третото место лекот „диазепам“. На првите 10 најкористени лекови на товар на Фондот, според бројот на реализирани рецепти, отпаѓаат околу 46 проценти од вкупниот број на рецепти реализирани во 2024 година. 

Depositphotos

Лекот со генеричко име „росувастатин“ (rosuvastatin) е на прво место според вкупниот износ и за него во 2024 година се фактурирани вкупно 241,3 милиони денари (3,9 милиони евра), што претставува околу 7,4 проценти од вкупниот износ за лекови. Овој лек спаѓа во групата на кардиолошки лекови што го намалуваат нивото на масти во серумот. Првите 10-те лекови со најголема потрошувачка според вкупниот износ, учестуваат со 40 проценти во вкупниот износ на лекови за 2024 година.