Растат приходите на „Реплек“ од продажбата дома и во странство

„Реплек“ минатата година оствари единечна добивка од 166,1 милиони денари (2,7 милиони евра), што е зголемување во однос на претходната година кога добивката по оданочување изнесувала 158,3 милиони денари(2,5 милиони евра), покажува неревидираниот единечен биланс на успех на компанијата објавен преку Македонската берза. Компанијата лани има консолидирана добивка од 224,1 милиони денари (3,6 милиони евра), што е намалување во однос на претходната година кога консолидираната добивка изнесувала 280,6 милиони  денари (4,5 милиони евра).

Од „Реплек“ информираа дека лани консолидираните приходи од продажба во сегментот фармација изнесуваат 1,9 милијарди денари (31,2 милиони евра) и бележат раст за 24 проценти во однос на 2023 година. Оттаму додаваат дека дека вкупните приходи од продажба на домашен пазар изнесуваат 492 милиони денари (8 милиони евра) и истите се зголемени за 48 проценти во однос на претходната година. Вкупните приходи од продажба на странските пазари на годишно ниво изнесуваат 1,4 милијарди денари (23,2 милиони евра) и се зголемени за 18 проценти.

За идниот период, од „Реплек“ велат дека 2025 е трета година по ред во која се очекува компанијата да достигне 25 проценти раст на приходите од продажба во однос на претходната финансиска година.

„Во согласност со веќе објавениот пет годишен план за очекувани приходи од продажба за 2025 година на консолидирано ниво во сегментот фармација, се очекува раст од 31 милион евра за 2024 на 39 милиони евра во 2025 или за 25 проценти. Порастот на приходите од продажба се очекуваат на двата сегментирани пазари, домашен и странски“, наведуваат од компанијата.

Очекуваните продажби на домашниот пазар за 2025 во однос на 2024 се очекува да достигнат раст од 21 проценти односно од 8,1 милиони евра на 9,8 милиони евра.

„Долгорочна стратегија на ‚Реплек‘ е да го зајакне присуството на домашниот пазар преку зголемување и подобрување на производствените капацитети, и проширување на понудата со производи кои ќе помогнат во одржување на општата здравствена добросостојба на потрошувачите согласно навиките во модерниот начин на живеење“, посочуваат од „Реплек“.

Приходите од продажба на странски пазар се очекува да го следат истиот тренд, при што порастот за 2025 се очекува да биде 26 проценти односно пораст на приходите од продажба од 23,1 милиони евра во 2024 на 29,2 милиони евра во 2025 година. 

„Како на домашниот така и на странскиот пазар овој пораст се должи на проширување на капацитетите на тековните производи како и збогатување на портфолиото на производи“, велат од „Реплек“.

Компанијата очекува годинава да почнат со работа првите претставништва надвор од Македонија.

„Во првиот квартал започнува со работа претставништвото во Србија а веќе од вториот квартал се очекуваат и првите продажби од претставништвото во Босна и Херцеговина“, наведуваат од „Реплек“.

Од компанијата укажуваат дека покрај пораст на приходите од продажба, „Реплек“ активно работи на подобрување на ефикасноста на процесите, а со тоа и подобрување на профитабилноста.

„‚Реплек‘ останува посветен на реализација на објавениот долгорочен план и во делот на профитабилноста, со што очекувана добивка за 2025 останува на ниво од 5,5 милиони евра“, информираат од компанијата.