Поделени акциите на „Реплек“, за акционерите по 2.700 денари дивиденда

Собранието на акционери на домашната компанија „Реплек“ донесе одлука за поделба на обичните акции издадени од друштвото во сооднос 1:10 односно една обична акција се дели на десет нови обични акции.

„Со поделбата на обичните акции се врши намалување на поединечниот номинален износ по акција од 562,42 евра на поединечен номинален износ по акција од 56,242 евра“, се наведува во одлуката објавена преку Македонската берза.

Со поделбата на обичните акции, основната главнина на друштвото се дели на 259.200 обични акции, со поединечен номинален износ по акција од 56,242 евра. Секој акционер на друштвото за секоја обична акција со поединечен номинален износ по акција од 562,42 евра пред поделбата на обичните акции на друштвото, врз основа на оваа одлука, се стекнува со по десет обични акции издадени од друштвото со поединечен номинален износ по акција од 56,242 евра.

Со поделбата на акциите, основната главнина на друштвото би останала непроменета.

Акционерите ја потврдија одлуката за поделба на дивиденда од 3.000 денари по акција во бруто-износ, односно 2.700 денари нето.

Друштвото по основ дивиденда на акционерите ќе им исплати вкупно 71.427.000 денари (1,16 милион евра), а  нето-добивката по оданочување е 158.327.905 денари или 2,6 милиони евра. 

„Реплек“ АД Скопје во текот на минатата година во консолидираниот извештај прикажа добивка од 280,6 милиони денари (4,5 милиони евра), што е зголемување за 242 процента во однос на претходната година, кога добивката на компанијата изнесувала 81,9 милион денари (1,3 милион евра).

Во моментов нема коментари за веста. Биди прв да коментира...

Остави коментар