„Реплек“ оствари раст од 44 отсто на приходите од продажба во фармација

Друштвото „Реплек АД“ оствари раст од 44 отсто на приходите од продажба во фармација во првите девет месеци годинава, во споредба со истиот период минатата година, објави компанијата на Македонската берза. Вкупните приходи од продажба во сегментот фармација за тој период изнесуваат 1.087 милиони денари (17,7 милиони евра) и се зголемени за 335 милиони денари.

Во исто време приходите од продажба на странските пазари се зголемени за 52 отсто. Учеството на странските продажби во вкупните во овој сегмент е 81 отсто, за разлика од 77 отсто во 2022 година. Приходите од продажба на домашниот пазар во сегментот фармација се зголемени за 21 отсто во однос на истиот период минатата година.

Душан Пецовски, генерален директор на „Реплек АД“, вели дека остварените резултати во третиот квартал се историски најдобри за компанијата од нејзиното постење. „Новиот стратегиски пристап, диверзификацијата на ресурсите, како и зајакнувањето на квалитетот на нашето портфолио се клучните причини за постигнатите резултати“.

Според Пецовски, во компанијата настанале промени што го зголемуваат капацитетот за посилен раст во следниот период. „Развојот на ’Реплек АД’ е значаен за македонската фармација бидејќи е директна потврда за потенцијалот и експертизата што ја имаме, особено во човечкиот капитал. ’Реплек АД’ ќе продолжи со огромна посветеност да ја гради својата приказна и во следниот период“, додава тој. 

Компанијата е присутна на пазарите во Европската Унија, регионот Адрија, како и на пазарите во Централна и Југоисточна Азија, а некои од производите од фармацевтската програма на компанијата се едни од најпродаваните на одделни пазари.

Во фармацевтскиот деловен сегмент компанијата планира и раст на приходите од 41 отсто до крајот на 2023 година во споредба со лани.