Министерство за земјоделство, шумарство и водостопанство подготвува закон за основање на Агенција за шуми. Во најавата за подготовката на новата регулатива објавена на Единствениот национален електронски регистар на прописи (ЕНЕР) се вели дека изработката на нов закон за основање на Агенција за шуми произлегува од потребата за создавање ефективен систем за мултифункционално стопанисување со шумите.
„Со новиот закон за основање на Агенција за шуми се обезбедуваат услови за создавање ефикасна администрација и управување со шумите и одржлив развој на шумарскиот сектор заснован на европските стандарди“, се вели во најавата.
Истовремено се подготвува нов закон за шумите. Во образложението се вели дека со новиот закон ќе се обезбеди суштинско и реално уважување на природното богатство - шумите, врз кои природно интерес имаат државата, сопствениците на приватни шуми и граѓаните.
„Новиот текст на законот го уважува општиот-јавен национален интерес врз шумите со мерки и општо прифатени начела за управување со шумите, одржливо стопанисување и одржлив развој на шумите кои овозможуваат прифатлив начин на стопанисување за сопствениците на шумите (државни и приватни) со ограничување на нивните права на користење како би се обезбедило трајно постоење на шумите“, се вели во образложението објавено на ЕНЕР.
Во него се додава дека со донесување на новиот закон и усвојување на регулативата се очекуваат позитивните движења и подобрување на правната рамка преку појасни и попрецизни одредби поврзани со одржливо управување со шумите.
„Во досегашната пракса на функционирање на законот беа костантирани одредени недоречености и со овој закон се врши допрецизирање на некои одредби на законот“, пишува во образложението.
.webp){kind=icon}
