Трошењето во Македонија доби на интензитет

Раст на трговијата на мало во Македонија од 4,8 отсто во февруари годинава споредено со истиот месец лани регистрира Државниот завод за статистика. Растот се должи на поинтензивното дискрециско трошење - сегментот без храна и гориво.

Гледано по групи и класи, зголемување на прометот е забележано во групите: трговија на мало со непрехранбени продукти, освен гориво (номинално за 16 проценти, а реално за 11,3 отсто), трговија на мало, освен трговија со горива (номинално за 8,1 отсто, а реално за 4,4 проценти), трговија на мало со автомобилски горива (номинално за 2,8 проценти, а реално за 5,4  проценти). Пад е забележан само во реалната стапка во групата трговија на мало со храна, пијалаци и тутун за 1,6  процент.

Марина Петров Савиќ, виша аналитичарка за пазари во „Блумберг Адрија“, вели дека ова е очекувано бидејќи како што се смируваше инфлацијата, дел од дискрециското трошење (трошење на стоки што не се неопходни за живот) доби на интензитет.

„Во Северна Македонија платите растат најбрзо во регионот и во номинална и во реална смисла, што значително влијае на закрепнувањето на потрошувачката, која беше во мала негативна позиција во 2023 година (-1,2 отсто на годишно ниво). Растот на платите заедно со подобрувањата на пазарот на трудот и закрепнувањето на расположението на потрошувачите ќе бидат главните двигатели на растот на потрошувачката што го очекуваме и во наредниот период“, вели Петров Савиќ.

 

 

Во моментов нема коментари за веста. Биди прв да коментира...

Остави коментар