.webp){kind=icon}
Извршителите во Македонија за 18 години од постоењето наплатиле вкупно 1,92 милијарди евра по основ на барања за извршување, а само во минатата година вкупниот износ на наплатени средства изнесува 159,7 милиони евра, покажуваат податоците од годишниот извештај на Комората на извршители. Во минатата година работеле 95 извршители распоредени во 11 подрачја на основните судови во Македонија.
Лани, тие примиле вкупно 170.325 барања за извршување меѓу кои се и барања за извршувања кои извршителите ги преземале од канцеларии на свои поранешни колеги.
„Реално ново примени барања за извршувања во 2023 година има 99.785 предмети, а останатите 70.540 предмети се предмети кои ги имаат наследено новоименуваните извршители од извршителите чија должност престанала“, информираат од комората.
Во минатата година извршителите завршиле 76.572 предмети. Најмногу реализирани барања за извршување од примените во 2023 година или 14,34 проценти има подрачјето на Основен суд Охрид, Основен суд Струга и Основен суд Дебар, додека пак подрачјето на Основен суд Струмица и Основен суд Радовиш имаат најмал процент на реализација на примени барања за извршување во 2023 година односно 8,89 проценти.
Врз основа на добиените податоци од кварталните извештаи за 2023 година, според структура на доверители, извршителите во полза на државата наплатиле вкупен износ од 4,3 милиони евра. Воедно, во истиот период, назад во стопанството се влезени вкупно 132,3 милиони евра, додека пак во полза на физичките лица - доверители реализирани се 25 милиони евра.
Според структура на должници, извршителите во 2023 година наплатиле најмногу парични средства од должници правни лица, поточно 90,3 милиони евра, потоа од физички лица износ од 41,8 милиони евра и од државата 29,5 милиони евра.
