.webp){kind=icon}
Народната банка практикува високо ниво на транспарентност, се наведува во Извештајот за оцената на транспарентноста на Меѓународниот монетарен фонд (ММФ). Тоа придонесува за висока доверба на јавноста во оваа институција, за одржување на нејзината независност и за ефективноста на нејзините политики, соопштуваат од Народната банка.
„Во изминатите неколку години постојано расте бројот на соопштенија за јавноста, кој е повисок за 30 отсто во однос на 2018 година, а бројот на јавните настапи на раководните лица на Банката е зголемен дури повеќе од шест пати и тие се насочени кон различни целни групи. Централно место во оваа област зазема и финансиската едукација на јавноста, за што во 2022 година е формирана и посебна дирекција во Народната банка. Бројот на активности во оваа сфера постојано расте преку организирање работилници, обуки, предавања и издавање едукативни брошури за подигнување на нивото на финансиската писменост во земјава“, вели гувернерката Анита Ангеловска-Бежоска.
МИА
Зајакнувањето на транспарентноста го препознале и граѓаните, што се покажало преку анкетата спроведена од Светската банка, според која Народната банка ужива највисока доверба кај јавноста помеѓу домашните институции во земјава, што, како што се посочува во соопштението, е резултат на претпазливата монетарна политика што ја спроведува насочена кон задржување на стабилните инфлациски очекувања, стабилноста на девизниот курс на денарот и кон зајакнување на довербата во домашната валута.
„Но довербата на јавноста се гледа и во ефективноста на спроведуваните монетарни мерки и мерките за задржување на финансиската стабилност, што редовно се бележи и во извештаите на Европската комисија, на Меѓународниот монетарен фонд и на други релевантни меѓународни финансиски институции“, се наведува во соопштението од Народната банка.
Централната банка ќе продолжи со натамошно унапредување на транспарентноста, која е една од петте стратегиски цели и во планот на Народната банка за 2025-2027 година, во согласност со насоките од мисијата за оцена на усогласеноста на практиките на Народната банка со Кодексот на транспарентност на Меѓународниот монетарен фонд, посочи Бежоска на настанот што се одржа во Обединетиот виенски институт, на кој учествуваа и експерти од ММФ и од Швајцарската централна банка.
