Цената на струјата се зголемува од 0,65 до 1,92 проценти

Цената на електрична енергија за домаќинствата од 1 јули во прв блок останува иста, во втор блок има зголемување од 0,85 проценти, во трет блок од 1,92 проценти и во четвртиот блок ќе има зголемување од 1,88 проценти, додека цената на евтината струја ќе се зголеми за 0,65 проценти, информира Регулаторната комисија за енергетика (РКЕ).

Претседателот на РКЕ Марко Бислимоски, посочи дека со ова за 88 проценти од домаќинствата, коишто со својата потрошувачка влегуваат во првиот и втор блок трошокот за електрична енергија ќе се зголеми за 0,4 проценти. За осум проценти од домаќинствата од третиот блок трошокот за струја на месечно ниво ќе се зголеми за 0,48 проценти, а за четири проценти од домаќинствата кои што влегуваат со потрошувачка во четвртиот блок, трошокот ќе се зголеми за 0,57 проценти.

„Зголемувањето на цената за најголемиот дел од потрошувачите од домаќинствата е под 0,5 проценти“, рече Бислимоски.

Тој додаде дека ваквата одлука е овозможена откако на „ЕВН Хоум“ и била дадена насока 15 проценти од количините кои што не се обезбедени да ги набавува на берзата на електрична енергија што функционира во Македонија, во периодот кога цената на електричната енергија е близу до цената од 60 евра за мегаватчас што ЕСМ ја понуди на тендерот и дополнително со измените на Законот за енергетика што поминаа во вторникот во Собранието кои овозможија да се примени новата висина на маржата што сега е 9,9 проценти, а претходно беше 11,5 проценти, појасни Бислимоски.

Во моментов нема коментари за веста. Биди прв да коментира...

Остави коментар