Унгарската влада ќе ѝ позајми 500 милиони евра на Владата во земјава за реализација на капитални проекти во општините и за директна поддршка на домашната економија. На денешната средба на самитот на НАТО во Вашингтон македонскиот и унгарскиот премиер, Христијан Мицкоски и Виктор Орбан постигнале договор за специјална економска соработка меѓу двете држави.
„Заедно со премиерот на Унгарската Влада, господинот Виктор Орбан имавме исклучително квалитетна и плодна средба. Разговаравме за неколку теми меѓу кои и темата којашто можеби за македонските граѓани е најважна, а тоа е дека двете влади се договорија во иднина да воспостават специјална економска соработка, нешто што ќе значи сигурност и нешто што ќе значи финансиска стабилност за нашата македонска економија“ посочува Мицкоски.
Имајќи предвид дека се воспоставува специјална економска соработка, тоа ќе подразбира дека во иднина кога ќе има потреба Македонија ќе може повторно да се обрати до Унгарската Влада и да побара дополнителна поддршка.
„Сакам да ја информирам македонската јавност дека овие 500 милиони евра ќе бидат употребени на следниот начин, 250 милиони евра директно поддршка за македонската економија под истите услови, 3,25 отсто камата, три години грејс период, 12 години рок на отплата или вкупно 15 години. Македонската економија ќе добие услови коишто до сега не можела да ги добие на економскиот и финансискиот пазар, а 250 милиони евра ќе бидат наменети за капитални проекти коишто ќе бидат изведени во општините и ќе бидат исклучиво наменети за потребите на граѓаните“ соопшти Мицкоски.
Откако премиерот Христијан Мицкоски објави за заемот од половина милијарда евра од Унгарија, со реагираа од опозициската СДСМ обвинувајќи дека зад договорот склучен во четири очи лежат политички интереси. Од партијата укажуваат и на тоа дека кредитите од меѓународните финансиски институции се далеку поповолни од заемот која го нуди Унгарија.
.webp){kind=icon}
