Поради утврдени потенцијали ризици од употребата на мускулниот дел од желудникот на живината по здравјето на луѓето (можна контаминација со патогени - бактерии и вируси, присуство на токсини и друго), а за обезбедување висок степен на заштита на јавното здравје и интересите на потрошувачите, Агенцијата за храна и ветеринарство (АХВ) донесе решение за забрана за увоз и употреба на пилешки желудник наменет за човечка исхрана, во производство на подготовки и производи од месо. Решението ќе почне да се применува од 1 август годинава.
„Сите количества пилешки желудник што се претходно увезени и складирани, операторите со храна треба да ги потрошат во рок од 60 дена од денот на почнување на примена на решението. За превенирање од можна злоупотреба на веќе увезените количества, во наредните два месеца инспекциските служби на Агенцијата ќе спроведуваат засилени контроли во малопродажните објекти во кои се продаваат месо, подготовки и производи од месо, како и во месарниците и месните индустрии“, информираат од АХВ.
Одлуката за забрана за увоз на пилешки желудник АХВ ја донесе врз основа на резултатите на направената анализа на ризик од можни опасности по здравјето на граѓаните од консумација на овој тип внатрешни органи од живина и од резултатите од досега спроведените инспекциски контроли, со кои се утврдени злоупотреба и измама на потрошувачите од страна на неколку месни индустрии.
„Со контролите е утврдена употреба на овој вид внатрешен орган од живина во подготовки од месо во кои не смее да го има во согласност со одредбите од Правилникот за изменување и дополнување на Правилникот за барањата во однос на квалитетот на меленото месо, подготовки од месо и производи од месо („Сл. весник на РМ“, бр. 42 од 21.2.2019 година)“, соопштуваат од АХВ.
Оттаму посочуваат дека со овој подзаконски акт е забранета употребата на некои внатрешни органи, вклучувајќи и мускулен дел од желудник на живина во производство на мелено месо и подготовки од месо, како што се плескавиците и ќебапите, а кои може да се приготвуваат исклучително од месо од говеда, овци, кози и свињи и други додадени состојки, но не и од пилешки желудник и МОМ (месно обескостено месо).
„Употребата на мускулен дел од желудник на живина сега е дозволена исклучиво во производство на производи од месо (колбаси, сувомесни производи, конзерви и други производи), само во одобрен објект (месни индустрии) и само доколку наведените производи подлежат на соодветен термички топлотен третман“, истакнуваат од Агенцијата.
За донесувањето на решението, АХВ ги извести стопанските комори и Здружението на шпедитери.
.webp){kind=icon}
