Народната банка објави препораки до граѓаните за безбедно онлајн купување во пресрет на периодот на попусти, познат како Блек фрајдеј (црн петок). Оттаму велат дека купувањето преку интернет е лесно и брзо, но дека заштитата на сопствените финансии е од суштинско значење.
Од Народната банка препорачуваат да се купува од безбедни веб-страници и секогаш да се побараат „https://“ и икона за катанец во лентата за веб-адреси. При купување да се користат безбедни интернет-врски, односно никогаш да не се купува преку јавна вифи (Wi-Fi) мрежа и редовно граѓаните да ги проверуваат сопствените банкарски изводи за неовластени трансакции.
„Овозможете двофакторна автентикација: Додајте дополнителен слој безбедност на вашите сметки. Пазете се од премногу добри понуди: Ако изгледа премногу добро за да биде вистина, веројатно не е така! Вашата безбедност е приоритет - купувајте паметно, останете заштитени!“, препорачуваат од Народната банка.
Блек фрајдеј почнува денеска, па во многу трговски центри, дуќани и онлајн продавници повеќето производи за широка потрошувачка се нудат по намалени цени.
.webp){kind=icon}
