Какви промени ќе внесе Славески во монетарната политика?

Новоизбраниот гувернер на Народната банка Трајко Славески вели дека ќе ја оправда довербата што му е дадена и дека Народната банка ќе остане независна институција како досега.

Славески денеска даде свечена изјава откако доцна синоќа беше избран за гувернер со 68 гласа „за“, а 16 „против“.

Според него, Централната банка треба да се фокусира на трите основни цели, а тоа се ценовна стабилност, финансиска стабилност и поддршка на политиките на Владата.

„Се разбира законските надлежности се дефинирани, тоа е ценовна стабилност што за Република Македонија би значело ниска и стабилна инфлација и финансиска стабилност кои ќе бидат поддршка на амбициозните политики на Владата затоа што и една друга цел на Народната банка е да ги поддржува политиките на Владата и тоа ќе бидат основните приоритети“, изјави новиот гувернер.

Славески вели дека во претходниот период централните банки ги ширеа своите надлежности, поттикнати од Светската банка и другите меѓународни институции. Една таква надлежност, според него, е зелената агенда и тој смета дека ова прашање треба да се остави на другите институции, а Централната банка да се фокусира на трите основни цели.

МИА

Додаде дека очекувањата на јавноста се дека ќе има стабилен девизен курсот, но дека тој како професионален економист го следи и реалниот девизен курс.

„Очекувањата на јавноста се дека ќе има стабилен девизен курс, но овде сакам да кажам една работа, пошироката јавност е фокусирана на она што се нарекува номинален девизен курс, кој очекуваме да биде фиксиран, но јас како професионален економист го следам и реалниот девизен курс кој зависи од односот на нашите домашните цени и цените со нашите трговски партнери, пред сè оние во еврозоната. За жал, во изминатиот период, особено по 2022 година, имаме значителна реална апрецијација на реалниот девизен курс, а тоа се должи на високата инфлација кај нас, која беше повисока во просек од онаа во еврозоната. Реалниот девизен курс на денарот од ноември 2022 година до јануари од оваа година е зајакнат за 5,4 проценти во однос на сите трговски партнери, а во однос на еврото денарот има апресирано цели 9 проценти“, изјави Славески.

Според него, тоа значи губење на конкурентноста на македонската економија затоа што станува поскапа за трговските партнери што влијае на извозот.

„Еве ни претстои туристичка сезона во нашите туристички центри, имаме и откажувања на аранжмани со изговор од агенциите од странство дека Република Македонија станала релативно скапа земја. Ова значи дека ќе треба инфлацијата, стапката на инфлација да ја држиме во рамки на онаа во еврозоната. Тоа што имавме стабилен фиксен девизен курс изминатиов период се должеше на една единствена причина, нашата стапка на инфлација беше во рамките на онаа во еврозоната со која е врзан денарот“, смета тој.

На прашањето дали размислува за флексибилен девизен курс, Славески рече дека во никој случај нема дојде до тоа.

„Ако е преценета вредноста со ниска инфлација во рамките на таа од еврозоната со тек на времето ќе се испеглаат тие разлики“, посочи Славески