Државниот завод за статистика (ДЗС) пресмета пад на прометот на трговијата на мало на годишно ниво за 4,5 проценти.
Податоците на ДЗС покажуваат дека во месец јули годинава, споредено со истиот месец лани, прометот на мало со храна, пијалоци и тутун е намален за 11,8 проценти. За период од една година се намалил и прометот со непрехранбени производи за 6,1 отсто, додека кај категоријата трговија на мало освен за трговија со горива прометот е намален за 9 отсто.
Во меѓувреме, земјава веќе долг период се соочува со висока инфлација, која што во јули изнесува 16 проценти. При тоа, најголемо поскапување има токму на најнеопходните продукти за живот, што можеби придонесува за резервираност во потрошувачката и со тоа намален промет во трговијата на мало. Статистика претходно објави дека за една година лебот поскапел за 49,3 проценти, маслото за јадење за 65,1 отсто, млекото за 27,1 отсто, а цената на брашното се покачи за 35,8 проценти.
Во трговијата раст бележи единствено прометот во категоријата трговија на мало со автомобилски горива, од 11,5 отсто. Но, тука треба да се земе предвид дека во меѓувреме горивата поскапеа многу повеќе отколку просечниот годишен раст на цените од 16% измерен. Така, бензините за период од една година се продаваат за 26 отсто поскапо, додека дизелот се продава по цена повисока за речиси 70 проценти.
.webp){kind=icon}
