Македонците се фрлија на трошење - поттик за БДП, ама и за инфлацијата

За пет месеци од оваа година прометот во малопродажбата е за околу 200 милиони евра поголем од лани, покажуваат податоците на Државниот завод за статистика. Во оваа сума не влегуваат парите потрошени за моторни возила и мотоцикли.

Реалниот раст на малопродажбата во мај 2026 година изнесува 7 отсто на годишно ниво и ова е најголем раст од почетокот на оваа година.

Податоците на Државниот завод за статистика покажуваат дека потрошувачката на домаќинствата и понатаму останува еден од клучните столбови на растот на македонската економија. Во првиот квартал од оваа година уделот на финалната потрошувачка на домаќинствата во БДП изнесува 67,9 отсто што е значително забрзување во однос на крајот на минатата година.

Податоците за малопродажбата се потврда за отпорноста на потрошувачката во земјава. Во мај, според статистичките податоци, прометот во малопродажбата, без моторни возила и мотоцикли, надминал 480 милиони евра, а над 200 милиони од нив биле потрошени на храна, тутун и пијалаци.  За оваа намена годинава се потрошени над 15 отсто повеќе пари.

Со оглед на тоа дека овие податоци за малопродажбата не го вклучуваат купувањето на моторни возила, тие не даваат целосна слика за потрошувачката на домаќинствата.

„Затоа вреди да се погледне и пазарот на автомобили, кој често се набљудува како индикатор за подготвеноста на граѓаните за поголеми и долгорочни купувања. За разлика од секојдневната потрошувачка, купувањето автомобили обично бара повисоко ниво на економски оптимизам и финансиска стабилност“, вели аналитичарот на „Блумберг Адрија“, Руди Лукачиќ.

Според годишниот извештај на Министерството за внатрешни работи за 2025 година, лани во земјава биле регистрирани 727.198 возила. Кај 656.789 возила била продолжена важноста на регистрацијата, а 70.409 возила биле регистрирани за прв пат, од нив 16.513 биле нови возила. Овој број е тројно поголем во однос на 21024 годи.

Што стои зад оваа силна потрошувачка? Одговорот делумно го дава пазарот на труд. Растот на платите во Македонија во последните години беше значително посилен од просекот на Европската унија. Растот на платите во ЕУ главно остана под пет проценти на годишно ниво, а во земјава е значително повисок.

„Инфлацијата и понатаму е висока и останува над просекот на еврозоната, што значи дека граѓаните и понатаму чувствуваат повисоки цени. Но засега достапните податоци не упатуваат на слабеење на куповната моќ. Потрошувачката продолжува да расте бидејќи растот на платите и понатаму го надминува растот на цените“, вели Лукачиќ.

„Прашањето за остатокот од годината повеќе не е дали граѓаните ќе трошат, туку дали ваквото темпо на раст на платите и потрошувачката може да остане одржлив без создавање дополнителни инфлациски притисоци“, вели нашиот аналитичар.