Американците и инфлацијата – трошат повеќе, но купуваат помалку

Американските потрошувачи не се имаат откажано. Иако, го чувствуваат притисокот.

„Волмарт“ (Walmart Inc.), кој во четвртокот го објави својот најслаб раст на продажбата  за повеќе од шест години, првенствено поради својот фармацевтски бизнис, изјави дека потрошувачката останува на конзистентни нивоа дури и додека клиентите прават компромиси за да ја приоритизираат вредноста. „Таргет“ (Target Corp.) и „Хоум Дипо“ (Home Depot Inc.), исто така, деновиве објавија пораст на продажбата, благодарение на жилавите купувачи кои сè уште ги отвораат своите паричници кога ќе го пронајдат вистинскиот производ по вистинската цена.

Соочени со високи цени, намалување на заштедите и забавување на растот на платите, Американците бараат добри зделки во продавниците и уникатна стока, а се воздржуваат од големи купувања.

„Секако сме свесни дека луѓето мора да прават избори“, рече главниот финансиски директор на „Волмарт“,  Џон Дејвид Рејни, во интервју, додавајќи дека луѓето купуваат помалку артикли во просек по шопинг. „Со зголемувањето на цените на горивата, има постепен притисок врз потрошувачот во споредба со почетокот на годината.“

Потрошувачката е главен столб на економскиот раст, сочинувајќи речиси 70 отсто од вкупниот американски аутпут. Поголемите од вообичаено поврати на даноци напролет, стабилниот пазар на труд во поголемиот дел од оваа година и добивките на берзата им овозможија на Американците да продолжат со трошењето и покрај фрустрацијата од високите цени.

Економистите велат дека трошењето во САД може да забави во наредните месеци, но тоа е далеку од некакво намалување. Средната прогноза во анкетата на Блумберг меѓу економистите во август предвидува дека издатоците за лична потрошувачка ќе растат со годишна стапка од 2,1 отсто во третиот квартал, што е помалку од 3,2 отсто во вториот квартал.

 

Потрошувачката во САД се очекува да забави, но не и да застане 

Bloomberg Mercury

 

„Очекуваме потрошувачката да се врати на поумерено темпо во втората половина од годината“, вели Лидија Бусур, виш економист во „Ернст Јанг – Партенон“ (EY-Parthenon). Таа истакнува дека потрошувачите „се потпираат на заштеди, се потпираат на дел од добивките од инвестираните средства, а некои се потпираат на кредити за финансирање на нивните трошоци. Но, тоа е ситуација за која сметаме дека не е одржлива“.

Како што потрошувачите стануваат сè поселективни, станува уште поважно и потешко за трговците на мало да ја пронајдат вистинската комбинација на производи.

 

Пониски цени

„Волмарт“ ги намали цените на повеќе од 11.000 артикли во кварталот за привлече потрошувачите кои внимателно управуваат со своите буџети. Тоа е приближно двојно повеќе од прилагодувањата што најголемиот светски трговец на мало ги прави во типичен квартал. Компанијата ги искористува парите од повратот во врска со царините за да ги поддржи овие попусти.

Други трговци на мало забележаа дека иако купувачите сè уште не трошат многу пари за работи што бараат кредитирање, како што е реновирање на домот, тие купуваат многу протеински ужинки, пастелни тетратки и преносни електрични алатки.

„Таргет“, кој се стреми да го сврти повеќегодишниот пад, објави втор последователен квартал на раст на продажбата и забележа подобрување на побарувачката во различни категории и демографски групи. Продажбата на „Таргет“ во периодот пред да почне школската година - барометар за потрошувачката пред празниците - е зголемена за речиси 20 отсто во споредба со минатата година, рекоа раководителите.

 

Потрошувачите се притиснати помеѓу бавниот раст на платите и растечките цени

Bloomberg Mercury

 

„Гледаме дека нашите купувачи реагираат кога имаме вистинска комбинација од стил, дизајн и вредност за овие навистина важни периоди од годината“, рече главната директорка за трговија, Кара Силвестер, во разговор со новинарите оваа недела.

Раководителите на „Хоум Дипо“ изјавија дека купувачите купуваат производи за тераса, фрижидери и други поскапи предмети за кои обично не е потребно кредитирање. Тие, исто така, се интересираат и за градинарство, бојадисување и други помали зафати наместо големи реновирања.

Целокупниот ценовен притисок се намали во последните месеци, но националните просечни цени на бензинот тврдоглаво се држеа над 4 долари за галон поради војната во Иран. Удобноста од повратот на даноците исчезна. И важно е што просечната саатница  растеше побавно од потрошувачката инфлација, намалувајќи ја куповната моќ и растегнувајќи ги буџетите. Во јуни, стапката на лично штедење беше најниска од 2022 година досега.

„Американските потрошувачи конзистентно наоѓаат начини да трошат пари, што е шокантно и малку загрижувачки“, рече Грег Портел, водечки партнер за глобални пазари во консултантската компанија „Кирни“ (Kearney).

Многу потрошувачи сакаат да продолжат да трошат, дури и ако има некои тешки избори и тешки компромиси.