Ги откриваме македонските рекордери во добивка по вработен и профитни маржи

Со нето-добивка по вработен од 600.000 денари (безмалку 10.000 евра) во текот на 2024 година компаниите од градежниот сектор се убедливи рекордери во Македонија во однос на овој показател за продуктивноста. Податоците на Народната банка покажуваат дека нивната добивка по вработен лани била двојно поголема од просекот на целиот корпоративен сектор, кој изнесувал 300.000 денари (околу пет илјади евра), и е значително поголема од добивката по вработен во ИКТ-компаниите од 400.000 денари (околу 6.500 евра), со што оваа дејност го зазема второто место на листата дејности рангирани по овој показател.

Кои дејности имаат најголеми приходи по вработен?

Забележително е дека градежните компании имале рекордна добивка по вработен иако имале помали приходи по вработен, што е уште еден показател за продуктивноста. На врвот на листата дејности рангирани по остварени приходи по вработен лани биле трговијата на големо и мало, транспортот, складирањето и угостителството, со сума од 7,3 милиони денари (околу 118.000 евра). Потоа следуваат компаниите од индустријата, кои лани имале приходи по вработен од 5,5 милиони денари (околу 89.000 евра).

Кој создава најголема додадена вредност?

Кога станува збор за додадената вредност на ниво на дејности, убедливо на првото место лани повторно биле компаниите од трговијата на големо и мало, транспортот, складирањето и угостителството, што е разбирливо со оглед на тоа што тие се и најмногубројни. Имено, од вкупно 59.909 субјекти што доставиле завршни сметки во Централниот регистар за 2024 година, речиси половина односно 29.374 биле од горенаведените дејности.  

Сепак, големи се разликите кога се зема предвид колкава е додадената вредност по вработен. На врвот на оваа листа се дејностите поврзани со недвижен имот, стручни, научни, технички административни и помошни услужни дејности, каде што лани е реализирана додадена вредност по вработен во износ од 2,4 милиони денари (безмалку 40.000 евра).  

Каде има највисоки профитни маржи?

Дејностите поврзани со недвижен имот, стручни, научни, технички административни и помошни услужни дејности се на врвот на листата според остварената нето-профитна маржа, која лани изнесувала 12,3 проценти. Нето-профитната маржа се пресметува како сооднос на добивката и вкупните приходи. Всушност, овој сооднос покажува колкав процент од вкупните приходи останува како чиста добивка. На второто место на оваа листа се компаниите од ИКТ-секторот со нето-профитна мажа во минатата година од 11,2 проценти, а на третото е градежништвото со 10,7 проценти.

Овие три дејности лани имале повеќе од двојно повисока нето-профитна маржа од просекот во целиот корпоративен сектор во Македонија, кој лани изнесувал 4,9 проценти.

 

Во моментов нема коментари за веста. Биди прв да коментира...

Остави коментар