Пад на добивката кај повеќето банки од берзата: Како им оди на другите сектори?

Пет од вкупно седум банки што котираат на Македонската берза забележаа намалување на добивката во првото полугодие од годинава во споредба со истиот период минатата година. Единствени две банки што забележаа зголемување на добивката во овој период се „УНИ банка“ (+29,56 проценти) и „Комерцијална банка“ (+4,29 проценти), а убедливо најголемо намалување на добивката имаат „Централна кооперативна банка“ (-55,26 проценти) и „Стопанска банка“ АД Битола (-34,08 проценти). Ваквите резултати се своевиден пресврт ако се земе предвид дека во изминативе неколку години повеќето банки имаа забрзан раст на добивката.

Забавување на растот на добивката во целокупниот банкарски сектор во првите три месеци од годинава нотира и Народната банка.

„Во првиот квартал од 2025 година добивката на банкарскиот систем изнесуваше 4,46 милијарди денари (72 милиони евра) и е повисока за 112 милиони денари (1,8 милион евра) или за 2,6 проценти во споредба со добивката остварена во истиот период од минатата година. Овој раст е значително побавен во споредба со истиот период од 2024 година (кога остварената добивка беше поголема за за 14,9 проценти во споредба со првите три месеци од 2023 година)“, наведуваат од Народната банка во новиот извештај за ризиците во банкарскиот сектор.

Раст кај градежниците и повеќето земјоделски компании

Depositphotos

Двете градежни компании од берзата, „Гранит“ и „Фабрика Карпош“, забележаа значителен раст на добивката од 18,38 проценти и 43,93 проценти, соодветно.  

Во земјоделскиот сектор, пак, од вкупно пет компании, три забележаа зголемување на добивката (ЗК „Пелагонија“, „Кланица со ладилник“ и „Оранжерии Хамзали“), а две продолжија да работат со загуба( ГД „Тиквеш“ АД Кавадарци и „Струмичко поле“).

Шаренолика слика во индустријата и трговијата

Од вкупно 35 компании од индустријата што котираат на Македонската берза, 13 оствариле зголемување на добивката во првото полугодие од годинава споредено со истиот период минатата година. Меѓу нив се истакнуваат „Макстил“ и „Тетекс“, кои имале раст на добивката поголем од 100 проценти. Од друга страна, девет компании забележале намалување на добивката, а преостанатите работеле со загуба.

Од 12 трговски компании на берзата, во овој период само три оствариле зголемување на добивката. Намалена добивка исто така имале три компании, а преостанатите шест работеле со загуба.

    

Успешно полугодие за осигурителните и нафтените компании

Depositphotos

Двете осигурителни компании „Македонија осигурување“ и „Триглав осигурување“ бележат раст на добивката во првите шест месеци од годинава, а втората посебно се истакнува, со значително зголемување од 281,99 проценти.

Позитивни резултати имаат и двете нафтени компании од берзата. „Макпетрол“ оствари раст на добивката од 5,18 проценти, а „Окта“ забележа зголемување на добивката од 117,71 проценти.

Каква е состојбата во услужниот сектор и фармацијата?

Depositphotos

Од вкупно 16 компании од услужниот сектор, во првото полугодие од годинава седум забележале зголемување на добивката во однос на истиот период минатата година. Меѓу нив се истакнуваат „Макошпед“ (раст на добивката од 107, 55 проценти) и „Патнички сообраќај - Транскоп“ АД Битола (раст на добивката од 159,44 проценти). Намалување на добивката има кај три компании, а преостанатите работеле со загуба.

Раст на добивката имаа и двете фармацевтски компании од берзата „Алкалоид“ и „Реплек“, кој посебно со истакнува, со зголемување од 90,41 проценти.

 

Во моментов нема коментари за веста. Биди прв да коментира...

Остави коментар