Преку СЕПА од утре побрзи и поевтини плаќања во евра во девет македонски банки

Македонските граѓани и компании почнувајќи од утре (7 октомври) ќе имаат можност да извршуваат плаќања во евра кон земјите на Единствената област за плаќања во евра (СЕПА) побрзо и со значително пониски такси, објави Народната банка.

Ова е значаен чекор напред, откако Европскиот совет за плаќања го прифати барањето на земјава за приклучување кон СЕПА (SEPA), што значи дека домашните банки ќе бидат интегрирани во европските платежни системи. СЕПА опфаќа мрежа на 40 земји, кои вклучуваат и членки на Европската Унија, како и некои други европски земји.

Според објавените податоци, девет македонски банки се подготвени да започнат со извршување на плаќањата во рамките на СЕПА од 7 октомври. Тоа се „НЛБ банка“, „Стопанска банка“, „Комерцијална банка“, „Шпаркасе банка“, „Халк банка“, „Прокредит банка“, „ТТК банка“, „УНИ банка“ и „Централна кооперативна банка“. Три други банки работат на интеграцијата во системот и се очекува да бидат подготвени до крајот на првиот квартал од 2026 година.

Според официјалните тарифи на овие банки, плаќањата во евра кон земјите од СЕПА ќе бидат многу поевтини отколку преку традиционалното кореспондентно банкарство. За плаќања од 500 евра, граѓаните ќе заштедат во просек 1.340 денари. Односно, таксата за електронско плаќање ќе изнесува околу 260 денари, додека во моментов таа изнесува 1.600 денари преку кореспондентни трансфери. За приливите во евра од истата сума, граѓаните ќе платат 140 денари, што е половина од трошоците на кореспондентните трансфери (280 денари).

Компаниите ќе уживаат уште поголеми заштеди. За износ од 20.000 евра, трошоците за плаќање во евра ќе бидат осум пати помали во споредба со постојното банкарско решение. Компаниите ќе плаќаат околу 570 денари наместо 4.740 денари преку кореспондентно банкарство. За приливи од истата сума, компаниите ќе плаќаат трипати помалку, односно 390 денари наспроти 1.180 денари.

Поголема ефикасност

Народната банка и Македонската банкарска асоцијација ги повикуваат граѓаните и компаниите да ги искористат придобивките од интеграцијата во СЕПА и да ги користат дигиталните канали за плаќање. Преку оваа иницијатива, се очекува значително зголемување на ефикасноста и намалување на трошоците, што ќе биде корисно и за домаќинствата и за бизнисите.

Со овие новини, земјава значително ја подобрува својата интеграција во европскиот финансиски систем, што претставува значаен чекор во развојот на економијата и зголемувањето на конкурентноста на меѓународниот пазар.

Во моментов нема коментари за веста. Биди прв да коментира...

Остави коментар