Во време на глобални економски и геополитички турбуленции, кога нестабилните пазари го обликуваат секојдневието, има ли начин на кој компаниите можат да испорачаат стабилен раст? Од каде пари и како да се задоволи апетитот за профит не игнорирајќи ги ризиците? Ова се само дел од прашањата на кои ќе бараме одговори на една од најзначајните регионални конференции оваа есен. На 29 октомври, во хотелот „Мериот“, ќе се одржи новата конференција „Back to Business“, која ја организира „Блумберг Адрија“. Фокусот е на одржливиот економски раст, фискалната стабилност, макроекономското опкружување и иднината на финансиите во земјава, но секако и пошироко.
Релевантни соговорници во два одвоени панела ќе се обидат да дадат одговори на клучните предизвици во овој период. Настанот ќе го отвориме со вицегувернерката Ана Митреска, со која во контекст на актуелните геополитички тензии – од трговските политики до конфликтите што влијаат врз синџирите на снабдување – ќе одговориме на клучното прашање, а тоа е како Народната банка ги вградува овие ризици во своите макроекономски модели и проекции. Дали постои сценарио за реакција во случај на нагло влошување на надворешните услови и, се разбира, која е позицијата на Македонија во повеќе сценарија.
Во последните десет години македонскиот економски раст e побавен во споредба со земјите во регионот. Според БДП по жител во паритет на куповна моќ (PPS), Македонија моментално е на само 42 проценти од развојот на ЕУ. Најбрз раст во последните десет години забележаа Хрватска и Црна Гора. Во последните месеци дојдоа попозитивни сигнали, со раст поттикнат од странските директни инвестиции и посилниот пазар на трудот, па, така, сегашните просечни нето-плати се 47 проценти од просечната словенечка плата, додека во 2019 година тие беа 36 проценти. Михаел Блажековиќ, шеф на аналитичкиот тим, ќе ја презентира целата анализа што тимот ја подготви само за Македонија. Колкав раст на БДП треба да очекуваме и со што ќе биде поткрепен?
Во фокусот на првата дискусија се платите, продуктивноста и циклусот на раст на домашните бизниси во неизвесни околности, а на втората панел-дискусија ќе се дебатира за тоа како државата може да одговори на предизвиците од глобалната нестабилност преку иновативни финансиски решенија, јавно-приватни партнерства и реформи во даночниот систем.
Посебен сегмент ќе биде посветен на управувањето со долгови и нефункционални кредити.
Конференцијата „Back to Business“ претставува уникатна можност за вмрежување, размена на идеи и поставување нови насоки за економскиот развој на земјата.
Поддршка на конференцијата даваат спонзорите „Пивара Скопје“, „Волт“, „Прајсвстерахаус куперс“ (PWC), „ЕОС Матрикс“, „НЛБ банка“, „А1 Македонија“ и „Мтел“.
.webp){kind=icon}
