Отворена е Шведско–македонска стопанска комора

Деновиве во Стокхолм официјално беше отворена Шведско–македонската стопанска комора, чија основна цел се, како што кажаа основачите, продлабочување на трговските и бизнис-врските помеѓу двете земји и зголемување на инвестициските иницијативи, како во Шведска, така и во Македонија.

„Нашата цел е да изградиме мост меѓу шведските и македонските компании и институции – да создадеме можности за нови партнерства, инвестиции и иновации. Формирањето на Комората во Стокхолм е само почеток на една долгорочна приказна на заеднички успех. Верувам дека преку оваа иницијатива ќе успееме да ја зголемиме видливоста на Македонија како стабилна и привлечна деловна дестинација за шведските инвеститори. Очекувам Комората да има позитивно влијание на зголемување на инвестициската активност и трговската размена и споделување добри деловни практики помеѓу Шведска и Македонија“, рече потпретседателот на Управниот одбор на Шведско–македонската стопанска комора, Димитар Клисаровски, кој е генерален директор на компанијата „Диаверум Македонија“, инаку шведска инвестиција во земјава.

Трговската размена помеѓу двете земји е релативно скромна, но со тенденција на раст, особено во делот на извозот од Македонија, покажуваат податоците на Државниот завод за статистика. За првите осум месеци од 2025 година, македонскиот извоз во Шведска изнесува 37,9 милиони евра, додека увозот е 25,9 милиони евра. Најголем дел од извозот е концентриран во неколку категории: кондиторски производи, жичени производи, облека, обувки, овошје и зеленчук, машини и производи од кожа.

„Во споредба со другите скандинавски земји, Шведска се наметнува како далеку најзначаен партнер. Трговијата со Норвешка и со Данска е на значително пониско ниво, што укажува на фактот дека продлабочувањето на односите со Шведска претставува најлогичен пат за постепено интегрирање и со другите економии во регионот“, смета Самуел Наумовски–Викиус, извршен директор на Комората и иницијатор за нејзино формирање.

Тој додава дека во моментов на македонскиот пазар се активни повеќе од 40 шведски компании. Тие се распоредени во повеќе индустрии, опфаќајќи ги и автоиндустријата, телекомуникациите, медицинската опрема, текстилот, здравството, козметиката, но и трговијата. Од друга страна, повеќе од педесет „македонско“ поседувани компании работат во Шведска, најчесто во секторите на гастрономијата, продажбата на автомобили, информатичките технологии и недвижностите. 

„Овој двонасочен интерес укажува на тоа дека постои здрава основа врз која може да се изгради структурирана рамка за понатамошен развој на економските односи“, вели Наумовски–Викиус.

Од Комората велат дека ќе ги поврзуваат македонските и шведските компании преку организирање едукативни настани, деловни мисии, средби помеѓу бизниси, претприемачи, но и високи државни службеници. Таа треба да изгради доверба и кредибилитет преку своето институционално присуство, овозможувајќи компаниите да добиваат препораки и сертификација што носи тежина пред потенцијалните партнери.

На свечениот чин на прогласувањето почеток со работа на Комората на 24 октомври во Стокхолм поздравен говор имаше и Лота Јонсон Форнарве, пратеничка  во шведскиот парламент и членка на групата за пријателство во Шведска за Македонија, а се обрати и македонскиот амбасадор во Шведска, Џенк Сејфула.