Македонија лани остварила раст на БДП од 3,5 проценти

Државниот завод за статистика (ДЗС) соопшти дека стапката на раст на македонскиот бруто домашен производ во 2025 година изнесува 3,5 проценти. Според проценетите податоци, стапката на раст на БДП во четвртото тримесечје од 2025 година е 3,8 проценти.

Во четвртото тримесечје од 2025 година, поголем пораст е забележан во секторите: градежништво (14,6 проценти), стручни, научни и технички дејности, како и административни и помошни услужни дејности од 8,1 проценти.

„Финалната потрошувачка во четвртото тримесечје од 2025 година номинално расте за 6,4 проценти, а нејзиното учество во структурата на бруто-домашниот производ е 77,9 проценти“, наведе ДЗС.

Бруто-инвестициите во четвртото тримесечје од 2025 година номинално растат за пет проценти како резултат на порастот на бруто-инвестициите во основни средства.

Според сезонските и календарски приспособени податоци, стапката на раст на бруто-домашниот производ во четвртото тримесечје од 2025 година, во однос на четвртото тримесечје од 2024 година, е 3,4 проценти.

Објавените податоци на Државниот завод за статистика за раст на БДП во 2025 година се потврда за внимателниот и сериозен пристап при планирањето и водењето на фискалната политика, изјави на прес-конференција министерката за финансии Гордана Димитриеска-Кочоска, која истакна дека согласно податоците реалниот раст на БДП во 2025 година е во линија со проекциите на Министерството за финансии, а номиналниот раст е нешто повисок од очекуваниот.

Министерката рече дека растот на БДП од 3,8 проценти во четврото тримесечје од минатата година претставува потврда за позитивните економски движења во земјата и покажува континуитет во остварувањето на позитивни резултати во економијата кои веќе 6 квартали еден по друг го задржуваат ова темпо и создаваат услови за постигнување повисоки стапки на раст.

„Особено значајно е што растот се надоврзува на високиот раст од 4,3 проценти во истиот квартал од минатата година што укажува на континуитет во остварувањата“, посочи министерката.

Споредено со земјите од регионот и од ЕУ, Македонија повторно е меѓу земјите со највисок раст (четврти), при што повисок раст е забележан само во Малта, Кипар и Полска. Доколку споредуваме со земјите од регионот, растот во Србија изнесува 2,2 проценти, во Хрватска 3,6 проценти, во Бугарија 3 проценти, а во Словенија 2 процента.  

 

Таа наведе дека растот на економската активност во четвртиот квартал е на широка основа и дека силната динамика во градежништвото се должи на зголемената активност во нискоградбата која забележа реален раст од 12,5 проценти во четвртиот квартал. Според неа, тоа е уште една потврда дека силната посветеност на Владата на реализацијата на капиталните инвестиции и оптимизацијата на нивните трошоци придонесе за динамизирање на економската активност. Исто така, го истакна високиот раст од 8,1 проценти кај стручните и научните дејности, растот од 4,4 проценти во трговијата и транспортот, 3,6 проценти раст во преработувачката индустрија и 2,7 проценти раст кај дејностите со недвижен имот.

„Она што особено охрабрува е високиот раст на извозот на стоки и услуги од 9,7 проценти на реална основа, што упатува на понатамошно закрепнување на извозната активност започната од почетокот на годината, по намалувањето во изминатите години. Увозот од друга страна забележа раст од 3,3 проценти со што нето-извозот имаше позитивно влијание врз економската активност. Приватната потрошувачка остана стабилна со реален раст од 2 процента подржана од растот на платите“, посочи министерката за финансии. 

На прес-конференцијата соопшти дека буџетскиот дефицит за 2025 е во рамки на очекуваното од 4 проценти од БДП, додека кај јавниот долг има намалување и согласно објавените податоци изнесува 59,3 проценти од БДП.