ММФ ја намали прогнозата за глобален раст на 3,1 отсто, не се исклучува и рецесија

Меѓународниот монетарен фонд (ММФ) ја намали прогнозата за глобалниот економски раст за оваа година, откако војната на Блискиот Исток предизвика силен нафтен шок и отвори ризик од значително економско забавување доколку конфликтот продолжи и дојде до поголеми оштетувања на енергетската инфраструктура.

Според новиот извештај World Economic Outlook, глобалниот БДП сега се очекува да порасне за 3,1% оваа година, што е намалување од претходната прогноза од 3,3% во јануари. Проекцијата се базира на претпоставка за релативно краток конфликт и умерен раст на цените на енергентите.

Поради високата неизвесност околу последиците од американско-израелскиот напад врз Иран, ММФ изработи три можни сценарија. Во најтешкиот исход, глобалната економија би се приближила до рецесија, која фондот ја дефинира како раст под 2%.

Bloomberg

„Глобалните економски изгледи нагло се влошија по избувнувањето на војната на Блискиот Исток“, се наведува во извештајот. Во него се додава дека пред конфликтот постоеле услови за подигнување на прогнозата, поттикнати од инвестициите во технологија, намалувањето на трговските тензии, фискална поддршка и поволни финансиски услови.

Најголем удар се очекува за земјите во развој, каде растот е намален на 3,9% од претходно проектираните 4,2%. Развиените економии, вклучително и САД, би биле помалку погодени бидејќи се нето извозници на нафта.

Економските последици од конфликтот, кој практично го наруши движењето низ Ормускиот теснец и предизвика нагло зголемување на цените на нафтата, ќе бидат клучна тема на состаноците на министрите за финансии и гувернерите на централните банки во Вашингтон, во рамки на пролетните состаноци на ММФ и Светската банка.

Bloomberg

Во однос на инфлацијата, ММФ предупредува дека таа би можела да се зголеми во сите сценарија. Во најоптимистичката варијанта, глобалната инфлација би достигнала 4,4%, додека во средното сценарио растот би забавил на 2,5%, но со инфлација од 5,4%. Во најлошото сценарио, со цена на нафтата од околу 110 долари за барел, глобалниот раст би паднал под 2%, а инфлацијата би се искачила до 6,1% во следните години.

ММФ предвидува дека американската економија би пораснала за 2,3% оваа година, што е мало намалување во однос на претходната проценка, додека Европа би се соочила со значително забавување, при што Германија и Обединетото Кралство би пораснале само околу 0,8%.

Bloomberg

Во поширокиот регион на Блискиот Исток и Централна Азија растот би забавил на 1,9%, а некои земји како Бахреин, Ирак, Кувајт и Катар би можеле да забележат пад. За Иран се предвидува пад на БДП од 6,1%, што е драматичен пресврт во однос на претходно очекуваниот раст.

Главниот економист на ММФ, Пјер-Оливие Гуринша, изјави дека конфликтот го прекинал економскиот замав, нагласувајќи дека конечниот ефект ќе зависи од неговото времетраење и од брзината на нормализација на енергетските текови по завршувањето на непријателствата.