Трошоците за сервисирање на јапонскиот долг ќе достигнат рекордни 230 милијарди долари

Министерството за финансии на Јапонија ќе побара рекордни 36,6 билиони јени (230 милијарди долари) за трошоци поврзани со сервисирање на државниот долг во својот првичен буџетски предлог за следната фискална година, според документи до кои дојде „Блумберг“. Ова претставува значително зголемување што го нагласува сè поголемиот товар од повисоките каматни стапки.

Од вкупната сума, околу 16,6 билиони јени ќе бидат наменети за исплата на камати, а 20 билиони јени за отплата на долгови што доспеваат. Според документите, оваа комбинирана сума би претставувала раст од 17 отсто во споредба со 31,28 билиони јени издвоени за сервисирање на долгот во првичниот буџет за тековната фискална година.

При процената на трошоците, министерството користело привремена каматна стапка од 3,8 отсто, што е највисоко ниво во речиси три децении, според лице запознаено со ова прашање.

Зголемувањето доаѓа во време кога приносите на државните обврзници растат, делумно поради загриженоста околу фискалната агенда на премиерката Санае Такаичи, која вклучува стратегија за економски раст и планирано намалување на данокот на потрошувачка. Такаичи сè уште нема објаснето како ќе се финансираат овие мерки. Конфликтот на Блискиот Исток и растечките фискални грижи во другите големи економии дополнително придонесуваат за зголемување на трошоците за задолжување на глобално ниво.

Се очекува да пораснат и другите буџетски барања како дел од реформата на буџетската рамка што ја спроведува Такаичи. Според извори запознаени со темата, вкупниот буџет за првпат ќе надмине 130 билиони јени.

Јапонските министерства во наредните денови ќе ги достават своите барања за финансирање за фискалната година што започнува во април, со што ќе започне годишниот процес на подготовка на буџетот. Се очекува вкупната вредност на барањата да достигне историски максимум, бидејќи Такаичи настојува повеќе трошоци да бидат вклучени уште во првичниот буџет, наместо подоцна да се финансираат преку дополнителни буџети.

Користењето на дополнителни буџети е редовна практика во јапонската фискална политика веќе со децении и придонесува кон перцепцијата дека Токио води релативно лабава политика на јавна потрошувачка.