Претседателот на Федералните резерви на Св. Луис, Џејмс Булард вели дека пет до 5,25 отсто е „минимумот“ за зголемување на каматните стапки за кое треба да се одлучат властите со цел да ја држат под контрола највисоката инфлација во последните 40 години.
„Во минатото реков 4,75 до пет отсто,“ им рече тој на новинарите по говорот во Луисвил, Кентаки. „Врз основа на оваа анализа денес, би рекол 5-5,25 отсто. Тоа е минималното ниво кое е потребно“.
За време на неговите претходни изјави, Булард ги повика креаторите на политиките дополнително да ги зголемат каматните стапки, велејќи дека нивото ќе треба да биде повисоко за да се исполни целта на централната банка и да се намали инфлацијата.
Булард презентираше графикони кои покажуваат дека доволно рестриктивната стапка се движи меѓу пет и седум отсто, иако тој не прецизираше кое ниво го претпочита.
За оваа пресметка користел различни верзии на правилото за монетарна политика развиено од Џон Тејлор од Универзитетот Стенфорд.
Булард е еден од најголемите застапници на „јастребската“ политика оваа година, и е последниот од централните банкари што повика на дополнителни мерки. ФЕД ги зголеми стапките за 75 базични поени на 2 ноември, четврти пат по ред, како дел од најагресивното заострување од 1980-тите за да ја спречи инфлацијата, која е на највисоко ниво во последните четири децении.
„Досега, се чини дека промената на монетарната политика имаше само ограничени ефекти врз инфлацијата, но пазарните цени сугерираат дека се очекува дезинфлација во 2023 година“, рече Булард.
Повикот на Булард доаѓа во време кога неколку негови колеги повикаа на помало зголемување на каматната стапката по минатонеделниот извештај кој покажа омекнување на инфлацијата во САД.
„Можно е финансискиот стрес да се зголеми“, рече Булард. Сепак, поради транспарентноста со која се испорачаа овие зголемувања на каматните стапки, заедно со насоките за иднината, „се чини дека досега имаше релативно уредна транзиција кон повисоки каматни стапки“, рече тој.
Булард вели дека индексот на финансиски стрес во Сент Луис укажува на релативно ниско ниво на финансиски стрес досега, и покрај наглото зголемување на стапките оваа година.
.webp){kind=icon}
