.webp){kind=icon}
Претседателот на филијалата на Федералните резерви (ФЕД) на Сент Луис, Џејмс Булард, изјави дека финансиските пазари ги потценуваат шансите централните банкари следната година да одлучат поагресивно да ги зголемат каматните стапки за да ја намалат стапката на инфлација.
„Сè уште постои верување дека инфлацијата ќе се намали сама по себе“, рече Булард во понеделникот во интервју за „Маркет воч“ (MarketWatch).
По овие коментари, акциите потонаа подлабоко во црвено, а приносите на државните обврзници се зголемија. Претседателот на филијалата во Њујорк, Џон Вилијамс, во исто време објави дека централните банкари мора да направат повеќе за да ја намалат инфлацијата, која е „премногу висока“.
Претставниците на ФЕД најавија дека би можеле да ги зголемат каматните стапки за 50 базични поени на нивниот последен состанок за оваа година, по четири последователни зголемувања од по 75 базични поени. На истиот состанок би можело да има ревизија на највисокото ниво до кое треба да пораснат цените за задолжување за да се доведе инфлацијата во рамките на целта.
Референтната каматна стапка сега се движи меѓу 3,75 и 4 проценти.
Вчера Булард повтори дека ФЕД треба да достигне ниво од најмалку пет проценти, но и до седум проценти, за да се спушти инфлацијата од својот максимум во последните четириесет години.
Записниците од ноемврискиот состанок покажуваат дека постои согласност меѓу официјалните лица дека неодамнешните промени на стапките треба да се разгледаат, при што „значително мнозинство“ се согласило дека наскоро може да биде време да се зголемат каматните стапки со побавно темпо. Има помалку детали за размислувањата за конечната стапка, па наведено е дека „некои“ банкари сметаат дека таа треба да биде малку повисока отколку што се мислеше претходно.
Инвеститорите очекуваат дека ФЕД ќе го забави зголемувањето на каматните стапки од следниот состанок и дека тие ќе достигнат врв од околу пет проценти следната година, покажуваат податоците од фјучерс-берзата.
И покрај обидите на ФЕД да го ограничи економскиот раст за да ги намали инфлациските притисоци во земјата, економијата е отпорна.
Централните банкари в петок ќе ги добијат најновите податоци за состојбата на пазарот на трудот, анкетите покажуваат дека во ноември може да се додадат околу 200.000 нови работни места, а стапката на невработеност ќе биде околу 3,7 отсто.
„Пазарот на трудот останува исклучително силен“, рече Булард, осврнувајќи се на податоците. „Тоа му дава на ФЕД основа да ја продолжи својата политика“, додаде тој.
Иако економистите предвидуваат дека ќе дојде до рецесија наместо таа да се избегне, Булард предвидува мал пораст, а не намалување на економската активност. „Прогнозите за економскиот раст за четвртиот квартал се добри“, заклучи тој.
