Транспортот поскапе за 9,5 отсто за една година, инфлацијата забрза во октомври

Индексот на трошоците на животот во октомври 2026 година, во однос на октомври 2025 година, бележи зголемување од 3.3  отсто, додека индексот на цените на мало бележи зголемување од 3.2  отсто, соопшти државниот завод за статистика.

На месечно ниво инфлацијата мерена преку индексот на трошоците на животот во октомври 2026 година, во однос на септември 2026 година, изнесува 0.4 отсто, индексот на цените на мало е повисок за 0,2 отсто. 

На годишно ниво најмногу поскапело горивото. Според статистичките податоци, транспортот во октомври годинава е за 9,5 отсто поскап во однос на лани. Трошоците за рекреација, спорт и култура се зголемиле за 8,5 отсто, а за образование над 5 отсто.

Трошоците за храна на годишно ниво бележат раст од 2,1 отсто. Највисок раст кај прехранбените производи бележат зеленчукот, месото и маслата. Најзабележително намалување има кај трошоците за овошје.

На месечно ниво статистиката измерила дека најголем раст има кај алкохолните пијалаци, тутунот и наркотиците. Најголемо намалување на трошоците има кај покуќнината, опремата за домаќинствата и редовно одржување на домаќинствата.

Инфлацијата во еврозоната е двојно повисока од целта на ЕЦБ

Инфлацијата забрза и во еврозоната и достигна двојно повисоко ниво од целта на Европската централна банка (ЕЦБ).

Потрошувачките цени во октомври пораснаа за 4 отсто во споредба со истиот период минатата година, во однос на 3,8 отсто во претходниот месец, соопшти во средата „Евростат“. Тоа е највисоко ниво од септември 2023 година и е во согласност со просечната процена во анкетата на „Блумберг“.

Базичната инфлација, која ги исклучува ставките како енергијата, што го поттикнаа најновиот бран ценовен притисок, остана на 2,5 отсто, како што беше очекувано, додека показателот за инфлацијата во услугите благо се зголеми на 3,3 отсто.