.webp){kind=icon}
Директорката на Меѓународниот монетарен фонд (ММФ), Кристалина Георгиева, предупреди дека глобалната економија ја чека „тешка година, потешка од годината што ја оставаме зад нас“.
„Очекуваме една третина од светската економија да биде во рецесија“, рече Георгиева во интервју за Си-Би-Ес што се емитуваше на 1 јануари. „Зошто? Затоа што трите големи економии - САД, ЕУ, Кина - сите во исто време забавуваат“.
ММФ веќе во октомври предупреди дека повеќе од една третина од глобалната економија ќе се намали и дека има 25 отсто шанси глобалниот БДП да порасне за помалку од 2 отсто во 2023 година, што го дефинира како глобална рецесија.
Разгледувајќи ги трите најголеми економии, Георгиева прогнозираше мешана слика за нивната способност да ја издржат кризата.
Иако „САД би можеле да избегнат рецесија“, Европската унија е „многу тешко погодена од војната во Украина - половина од ЕУ ќе биде во рецесија следната година“, рече таа. Во исто време, Кина е пред „тешка година“.
„Негативни трендови“
Податоците објавени во саботата покажаа дека кинеското нагло поместување од политиката „Ковид нула“ ја турна економската активност во декември на најбавното темпо од февруари 2020 година, бидејќи вирусот ги зафати големите градови и ги принуди луѓето да останат дома, а деловните активности да се затворат.
Забавувањето на најголемите економии „се преведува во негативни трендови на глобално ниво - кога ги гледаме пазарите во развој, сликата таму е уште пострашна“, рече Георгиева.
Податоците за индексите за набавки во производството покажаа негативни отчитувања низ Европа, Турција и Јужна Кореја. Податоците кои ќе бидат објавени утре треба да откријат слични страшни бројки за Малезија, Тајван, Виетнам, Велика Британија, Канада и САД.
Сепак, изгледите за најголемата светска економија може да понудат одмор.
„Ако таа издржливост на американскиот пазар на труд се одржи, САД би му помогнале на светот да помине низ многу тешката година“, рече Георгиева.
