Претставничкиот дом на САД доцна синоќа гласаше за договорот што го постигнаа претседателот на Домот, Кевин Мекарти, и претседателот Џо Бајден, чија цел е да се спречи катастрофално неплаќање од страна на САД поради постигнатата максимална граница на задолжување на државата.
Лидерите на двете партии претходно изразија уверување дека имаат доволно гласови да го усвојат нацрт-законот и да го испратат до Сенатот на неколку дена пред истекот на стандардниот рок на 5 јуни.
Бајден, Мекарти и нивните заменици работеа на телефонски лобирања за законот уште откако го склучија договорот во саботата вечер за да изградат доволно голема коалиција и да ги соберат потребните 218 гласа за усвојување во Домот.
„Мислам дека работите се одвиваат според планираното“, им рече Бајден на новинарите во Белата куќа, пред да замине за Колорадо.
Предлог-законот ќе го постави курсот за федералните трошоци за следните две години и ќе го суспендира плафонот на долгот до 1 јануари 2025 година. Во замена за гласовите на републиканците за суспензијата, демократите се согласија да ги ограничат федералните трошоци во следните две години. Од Белата куќа им рекоа на пратениците дека договорот ќе ги намали трошоците за околу една илјада милијарди долари во текот на една деценија, но републиканците тврдат дека намалувањето на трошоците ќе биде двојно поголемо. Непартиската канцеларија за буџет на Конгресот во вторникот процени дека законот ќе ги намали дефицитите за 1,5 илјада милијарди долари во текот на десет години.
.webp){kind=icon}