Патниците ги избраа најдобрите авиокомпании за 2023 година

„Сингапур ерлајнс“ го симна ривалот „Катар ервејс“ од престолот и се најде на првото место на листата најдобри авиокомпании во светот во 2023 година, според резултатите од годишната анкета меѓу патниците.

Блискоисточниот авиопревозник падна на второто место, а јапонските „Ол Нипон Ервејс“ (All Nippon Airways), „Емирати“ (Emirates) и „Јапан Ерлејнс“ (Japan Airlines) ги пополнија првите пет места на листата на „СкајТракс Ворлд Ерлајн Авордс 2023“ (Skytrax World Airline Awards 2023).

Катар, сепак, имаше „кец“ во ракавот. Доминираше во категориите за најдобри понуди во бизнис класата.

„ЕрАзија“ (AirAsia) беше прогласена за најдобра нискобуџетна авиокомпанија во светот, додека „Скут“ (Scoot) е најдобра нискобуџетна авиокомпанија на долги релации.

„Оваа награда е доказ за непобедливиот дух на нашите луѓе, кои работеа неуморно и направија многу жртви за да се осигура дека СИА е подготвена за закрепнување во воздушниот сообраќај“, рече Гох Чун Фонг, главен извршен директор на „Сингапур ерлајнс“. „Тоа ни овозможи да излеземе посилни и поподготвени од пандемијата како водечка меѓународна авиокомпанија“, додаде тој.

Највисоко рангирана северноамериканска авиокомпанија беше „Делта“, која се најде на 20-та позиција – подобрување за четири места во однос над минатата година. Европските авиопревозници поминаа малку подобро, со „Туркиш ерлајнс“ на шестото место, а „Ер Франс“ на седмото место. Наградата за најдобар кабински екипаж ја доби „Гаруда Индонезија“, додека наградата за најчиста авиокомпанија ја доби „АНА“.

Наградите беа доделени врз база на резултатите од онлајн анкета, која опфаќа патници од повеќе од 100 земји. Таа траеше од септември 2022 година до мај 2023 година, а во конечните резултати беа вклучени над 325 авиокомпании.

Во моментов нема коментари за веста. Биди прв да коментира...

Остави коментар