Централната банка на Кина (PBoC) неочекувано ги намали каматните стапки, со најбрзо темпо од 2020 година. Економијата на азиската земја има потреба од дополнителна помош бидејќи секторот на недвижности е во неволја, а потрошувачката слабее.
Народната банка на Кина ги намали каматните стапки на едногодишните заеми за 15 базични поени, на 2,5 отсто, што е второ намалување од јуни. Само еден од 15-те аналитичари анкетирани од „Блумберг“ предвиде таков потег, додека сите други очекуваа пауза.
Каматната стапка на краткорочните кредити е намалена за 10 базични поени.
Главна стапка (LPR) на едногодишен заем (виолетова линија), LPR на петгодишен заем (често основа за хипотекарни стапки, портокалова линија), неделна репо-стапка (сина линија) и едногодишна стапка на среднорочен заем (бела линија)
Bloomberg
Изненадувачкиот потег следуваше непосредно пред објавувањето на разочарувачките податоци за економската активност за јули, кои покажаа пад на потрошувачката, индустриското производство и инвестициите во сите сегменти, како и пораст на невработеноста.
Државниот завод за статистика објави дека домашната побарувачка сѐ уште е „недоволна“ и дека „основата за економско закрепнување допрва треба да се зајакне“. Кина треба „да го приспособи пристапот кон макроекономската политика и да се фокусира на зголемување на домашната побарувачка, зголемување на довербата и спречување на ризиците“, се наведува во соопштението на агенцијата за статистика.
Намалувањето на стапката доведе до пораст на цените на државните обврзници, додека јуанот ослабе. Приносот на 10-годишниот долг на Кина падна за седум базични поени, на 2,56 отсто, што е најниско ниво од 2020 година. Јуанот ослабна четврти ден по ред, паѓајќи за 0,23 отсто на 7,2744 јуани за долар.
Клучни податоци
Во јули индустриското производство се зголеми за 3,7 отсто на годишно ниво, но и за 0,6 процентни поени пониско од просечната вредност во анкетата на „Блумберг“.
Растот на продажбата на мало забави на 2,5 отсто, додека средната вредност во анкетата на аналитичарите беше четири отсто. Растот на обемот на инвестициите во основни средства се намали на 3,4 отсто во првите седум месеци, додека економистите беа пооптимистични и за овој показател (очекуван раст од 3,7 отсто). Прометот на пазарот на недвижности во овој период е намален за 8,5 отсто.
Невработеноста во градовите во јули порасна од 5,2 на 5,3 отсто. Во јуни (за кој се достапни последните податоци бидејќи се менува методологијата) стапката на невработеност кај младите од 16 до 24 години достигна рекордни 21,3 отсто.
.webp){kind=icon}
