Европската Унија планира да го искористи отсуството на Шји Џјинпинг и Владимир Путин од состанокот оваа недела на Групата 20 (Г20) за да им се обрати на нациите од таканаречениот глобален југ на средба на високо ниво со африканските лидери, на маргините на самитот.
Со оглед на тоа што и кинескиот и рускиот претседател се држат настрана од дводневниот собир во Њу Делхи, ЕУ сака да го искористи моментот, тврдат извори запознаени со подготовките, кои побарале да бидат анонимни. Блокот од 27 нации има цел да покаже дека е сериозен за редефинирање на партнерството со Африка, и покрај проблематичното наследство на колонијализмот, велат тие.
Меѓу оние што треба да учествуваат се претседателката на Европската комисија, Урсула фон дер Лајен, претседателот на Европскиот совет, Шарл Мишел, и германскиот канцелар Олаф Шолц. Од африканска страна ќе учествуваат лидери од Јужна Африка, членка на Г20, како и од Египет, Нигерија и од Коморските Острови, актуелен претседавач со Африканската унија.
Она што всушност треба да биде некаков мини-самит се случува кога се интензивира конкуренцијата за глобално влијание во услови на судир на САД и Кина и поделби околу руската војна против Украина.
Додека Кина и Русија направија упад меѓу африканските нации, вклучувајќи и апелирање на антиколонијалните чувства, повлекувањето на Путин од договорот за житото на Црно Море најмногу ги погоди земјите во развој, што може да остави простор Европа да влијае на мислењето на земјите што одбија да ја осудат војната на Русија против Украина.
На состанокот во Индија на 9 септември, европските лидери сакаат да ја поддржат кандидатурата на Африканската унија да стане постојана членка на Г20, тврдат доброупатени извори. Членството но АУ е исто така приоритет на домаќинот на самитот, индискиот премиер Нарендра Моди.
Во мај, за време на посетата на седиштето на Африканската унија во Етиопија, Олаф Шолц ги поддржа повиците на блокот да стане постојана членка на Г20 за да ѝ даде повеќе збор во напорите за справување со глобалните прашања како климатските промени. Германскиот канцелар тврдеше дека Африка мора да игра поголема меѓународна улога за да ја одрази нејзината растечка важност во сè пораспаднатиот и мултиполарен светски поредок.
Посилен глас
Постојаното членство, наместо она „повикана меѓународна организација“, ќе ѝ даде на Африканската унија ист статус како и ЕУ. Тоа е дел од настојувањето да им се обезбеди на африканските земји посилен глас кога меѓународните организации одлучуваат за мерките што ги засегаат, вклучувајќи ги и напорите за справување со глобалното затоплување - кое главно е предизвикано од емисии од земјите на Г20.
Исто така, на агендата на состанокот е дискусија за последиците од војната на Русија против Украина за глобалната безбедност на храната - ситуација што се заканува да ескалира откако Путин одби да го оживее договорот за жито со ОН по разговорите во понеделникот со турскиот претседател Реџеп Таип Ердоган.
.webp){kind=icon}
