Светот можеби не е подготвен за најлошото можно сценарио во кое Федералните резерви (Фед) ќе ја подигнат референтната каматна стапка на седум отсто, заедно со стагфлација, изјави извршниот директор на „ЏП Морган“ (JPMorgan Chase & Co), Џејми Дајмон, во интервју за „Тајмс оф Индија“ (Times of India).
„Ако има помал обем и повисоки каматни стапки, ќе има стрес во системот“, рече Дајмон за време на посетата на Мумбај на самитот на инвеститори на „ЏП Морган“. „Ворен Бафет вели дека ќе дознаете кој плива кога плимата ќе се повлече. Тоа ќе биде повлекување на плимата“.
Дајмон, кој посочи дека можеби ќе треба уште повеќе да се зголемат каматните стапки во борбата против инфлацијата, додаде дека разликата помеѓу пет и седум проценти ќе биде поболна за економијата отколку зголемувањето од три проценти на пет проценти.
Неговите коментари се спротивни од консензусот дека Фед се приближува кон крајот на процесот на затегнување на каматните стапки, откако ја зголеми референтната стапка за 5,25 процентни поени, доведувајќи ја до 22-годишен максимум од 5,5 проценти. Американските креатори на политиката сигнализираа дека каматните стапки ќе треба да останат високи подолг временски период за да се спречи инфлацијата, иако пазарите на пари проценуваат дека каматните стапки ќе бидат намалени почнувајќи од следната година.
Доколку клучната каматна стапка скокне на седум отсто, тоа ќе има сериозни последици за американските компании и потрошувачи. Економистите веќе ја проценуваат веројатноста за рецесија во САД во следните 12 месеци на 60 отсто, што е пооптимистичка процена во споредба со прогнозата за економски пад веќе оваа година, како што сметаат од „Блумберг економикс“.
Каматна стапка од седум проценти би го намалила неодамнешниот оптимизам кај претставниците на Фед за нивната способност да постигнат меко приземјување во економијата, имајќи предвид дека стапката на невработеност останува многу ниска, на 3,8 проценти, и има знаци за пад на цените.
„Минувањето од нула на два процента речиси и не претставуваше зголемување. Од нула на пет проценти изненади некои луѓе, но никој не би рекол дека пет проценти се недостапни“, рече Дајмон. „Не сум сигурен дека светот е подготвен за седум проценти“.
Фед месецов го остави опсегот за референтната каматна стапка непроменет, како што се очекуваше, иако најновите квартални проекции покажаа дека 12 од 19 функционери поддржуваат уште едно зголемување на каматните стапки оваа година. Еден функционер предвиде дека каматните стапки ќе достигнат повеќе од шест проценти.
Претседателот на Фед, Џером Пауел, рече дека идните одлуки за каматната стапка ќе зависат од податоците што доаѓаат.
.webp){kind=icon}
Во моментов нема коментари за веста. Биди прв да коментира...