Трамп: Земјите од БРИКС да се обврзат дека ќе го користат доларот

Новоизбраниот американски претседател Доналд Трамп ги предупреди земјите од БРИКС дека ќе бара да се обврзат дека нема да се обидат да создадат нова валута како алтернатива на употребата на американскиот долар. Ако тоа се случи ќе се соочат со царини од 100 отсто.

„Идејата дека земјите од БРИКС се обидуваат да се оддалечат од доларот додека ние стоиме и гледаме веќе не постои“, рече Трамп во објавата на неговата социјална мрежа.

„Бараме посветеност од овие земји дека нема да создадат нова валута или нема да поддржат друга валута што би го заменила моќниот американски долар. Во спротивно ќе се соочат со царини од 100 отсто и треба да очекуваат да се збогуваат со продажбата во прекрасните САД“, додаде тој.

Во својата изборна кампања Трамп вети дека напуштањето на американскиот долар скапо ќе ги чини земјите. И тој се закани дека ќе користи тарифи за да се осигури дека тие се усогласени. Заканата од саботата доби ново значење додека новоизбраниот претседател се подготвува повторно да ја преземе власта во јануари.

Трамп и неговите економски советници разговараа за начините за казнување на сојузниците и противниците кои сакаат да се вклучат во билатерална трговија со валути различни од доларот. Тие мерки вклучуваат разгледување на опции како што се извозни контроли, такси за манипулација со валута и трговски давачки, велат извори запознаени со ова прашање.

Трамп нагласува дека сака американскиот долар да остане светска резервна валута, велејќи во интервју за Си-ен-би-си во март дека „нема да дозволи земјите да го напуштат доларот“, бидејќи тоа би било „удар за нашата земја“.

Земјите од БРИКС – како што се колективно познати Бразил, Русија, Индија, Кина и Јужна Африка – разговараа за прашањето за дедоларизација на самитот во 2023 година. Реакцијата против доминацијата на доларот доби на интензитет во 2022 година кога САД ги предводеа напорите за воведување економски санкции кон Русија.

Економските советници на Трамп и неговата кампања беа особено гласни за таргетирање на БРИКС.

„Нема шанси БРИКС да го замени американскиот долар во меѓународната трговија, и секоја земја што ќе се обиде да го стори тоа треба да се збогува со Америка“, рече Трамп во саботата.

Новоизбраниот претседател веќе ги потресе светските пазари пред неговиот втор мандат, заканувајќи се дека ќе воведе дополнителни царини од 10 отсто за стоки од Кина и 25 отсто царини за сите производи од Мексико и Канада, доколку тие земји не направат повеќе за да го запрат протокот на нелегални дроги и мигранти без документи преку американските граници.

Канадскиот премиер Џастин Трудо се состана со Трамп во петокот за да разговара за трговските и граничните прашања во обид да се намалат тензиите меѓу двете сојузнички нации по заканата од царини.

Во моментов нема коментари за веста. Биди прв да коментира...

Остави коментар