Кинеската економија веројатно покажа стабилност во првите два месеца од годината и покрај тоа што американскиот претседател Доналд Трамп се врати на функцијата и речиси веднаш започна втора трговска војна со Пекинг.
Со оглед на тоа што креаторите на политиката ги чуваат стимулациите како резерва за царините, податоците што треба да се достават в понеделник ќе покажат дека продажбата на мало расте и инвестициите остануваат стабилни од минатогодишните бројки што се однесуваат за целата година, според прогнозите на економистите во истражувањето на „Блумберг“. Индустриското производство само малку ќе се лизне во период кога фабриките се затворени за лунарната Нова година.
Актуелна стапка на економски раст и очекувана стапка на раст на кинеската економија
Bloomberg
Доказите дека втората по големина економија во светот им одолева на ветриштата од трговската војна доаѓаат откако владата на претседателот Шји Џјинпинг месецов постави рекордна цел за буџетскиот дефицит и ја задржа биковската цел за годишен раст од околу пет проценти за 2025 година. Таа цел се соочува со предизвици со оглед на тоа што Трамп веќе двапати ги покачи царините за Кина, заканувајќи им се на компаниите (т.н. извозни мотори) што минатата година генерираа речиси третина од растот на бруто-домашниот производ.
„Очекуваме стабилни отчитувања за главните показатели за активноста за првите два месеца годинава“, велат економистите на „Ситигруп“ (Citigroup Inc.) во минатонеделниот извештај. „Очекуваме солиден почеток на годината со трговски ветришта што допрва треба да се материјализираат“, пишува во извештајот.
|
Националното биро за статистика треба в понеделник да ги објави економските податоци за јануари и за февруари. Очекувањата се:
|
Индустриско производство
Индустрискиот сектор го надмина растот на потрошувачите минатата година бидејќи Кина работеше на модел на раст во две патеки, а тој тренд се чини дека ќе продолжи. Индустриското производство веројатно се зголеми за 5,3 отсто во првите два месеца, според просечната прогноза на економистите анкетирани од „Блумберг“, што е пад од 5,8 отсто, колку што беше за целата измината година.
Индустриското производство забави во периодот јануари-февруари
Bloomberg
Според официјалните податоци, фабричките активности минатиот месец се вратија во експанзија и покрај тоа што администрацијата на Трамп започна глобална трговска војна, додека непроизводствената активност во градежништвото и услугите се зголеми во согласност со прогнозите. Кинескиот извоз достигна рекорд во првите два месеца, при што вредноста на продажбата достигна 540 милијарди долари бидејќи фирмите испорачаа повеќе стоки во блокот АСЕАН (ASEAN – Здружение на нации од Југоисточна Азија) и Европската Унија.
Шји годинава се обидува да го поддржи приватниот сектор и во обид да ја врати довербата неодамна беше домаќин на состанок со директорите на технолошките компании, вклучувајќи го и некогашниот коосновач на „Алибаба“ (Alibaba Group Holding Ltd.), Џек Ма.
Потрошувачка
Заживувањето на потрошувачката е предизвик за владата откако се укинаа контролите и правилата на дејствување поврзани со политиката на нулта ковид, а раните податоци покажуваат дека тие предизвици продолжуваат.
Продажбата на мало се зголеми за 3,8 отсто во изминатите два месеца, според истражувањето на „Блумберг“, што е мал напредок во однос на растот од 3,5 отсто постигнат минатата година, но е намален во споредба со растот од 5,5 отсто во 2023 година.
Што велат економистите на „Блумберг“?
„Потрошувачката беше најслабо подрачје со забавувањето на продажбата на мало и покрај зголемувањето на побарувачката за празниците во текот на лунарната Нова година. Во иднина стимулацијата објавена на Националниот народен конгрес во март треба да го поддржи закрепнувањето, но целта за раст од пет отсто за 2025 година сè уште изгледа како предизвик“, велат економистите на „Блумберг“ Чанг Шу и Дејвид Ку.
Кинеската инфлација стана негативна во периодот јануари-февруари, за првпат од 2021 година. И увозот неочекувано падна за 8,4 проценти на почетокот на годината, што е дополнителен доказ за слабата побарувачка.
За време на годишниот парламентарен собир во Кина месецов врвните лидери го поставија зајакнувањето на потрошувачката како главен приоритет, а тоа се случува за првпат откако Шји дојде на власт пред повеќе од една деценија. Но аналитичарите беа скептични околу тоа дали активностите како што е удвојување на државната поддршка (на 41,4 милијарда долари) се доволни за да се свртат работите.
Инвестициите во основни средства остануваат стабилни
Bloomberg
Колапсот на пазарот на недвижности во последните години ги намали активностите во овој сегмент и останува една од најболните точки во кинеската економија. Кризата придонесе за дефлациски притисоци бидејќи ги погодува цените на куќите каде што кинеските потрошувачи го вложуваат најголемиот дел од своето богатство.
Сепак, владините мерки за зајакнување на секторот доведоа до одредена стабилизација. Охрабрувачки знак е што забави падот на цените на нови станови (веќе петти месец по ред) бидејќи креаторите на политиката ги засилуваат напорите да му се стави крај на падот на вредноста на имотите.
Се чини дека тој тренд ќе продолжи, при што, според прогнозите, инвестициите во имот пораснаа за 3,2 отсто во првите два месеца.
.webp){kind=icon}
