Целиот свет е фокусиран на одлуките и преговорите на претседателите на САД, Русија и Украина. Во меѓувреме, пристигнува информација дека лидерот на една од најмоќните економии во светот купил обврзници вредни повеќе од сто милиони долари, додека фјучерсите на американските индекси се тргуваат со загуби.
БИЗНИС
Трамп купил обврзници вредни 103,7 милиони долари
Освен на геополитички план, американскиот претседател Доналд Трамп е активен и на полето на инвестициските активности, имајќи предвид дека од враќањето во Белата куќа купил стотици обврзници. Според документ објавен од Белата куќа, Трамп од почетокот на годината реализирал 690 трансакции со вкупна вредност од околу 104 милиони долари. Инвестициите, според процената на „Блумберг“, се дел од постојаната заложба на Трамп за зголемување на богатството, кое моментално е проценето на 6,4 милијарди долари според индексот на милијардери.
ПОЛИТИКА
Трамп: Орбан да не ја блокира Украина
Трамп го повикал унгарскиот премиер Виктор Орбан за да разговараат за причините поради кои Унгарија ги блокира преговорите за пристапување на Украина во Европската Унија. Повикот до Орбан следувал во понеделникот, по разговорите на Трамп со украинскиот претседател Володимир Зеленски и со европските лидери во Белата куќа, на кои главна тема била пронаоѓање решенија за завршување на војната во Украина. Освен за членството на Украина, Орбан изразил интерес Унгарија да биде домаќин на следната рунда разговори помеѓу рускиот претседател Владимир Путин и украинскиот лидер Зеленски.
Се разгледува испраќање трупи во Украина
„Блумберг“ дознава дека пакетот со безбедносни гаранции за Украина би можел да биде дефиниран уште неделава. Истовремено, европските лидери сакаат да ја искористат поддршката од Трамп за планот што вклучува испраќање европски трупи во Украина, како дел од потенцијален мировен договор. Еве и каква улога би можеле да одиграат САД во обезбедувањето безбедносни гаранции за Киев.
БЕРЗИ
Европа
Фјучерсите на европските акции утрово се тргуваат во минус, пред објавувањето на конечните податоци за инфлацијата во еврозоната. Според прелиминарните податоци, инфлацијата минатиот месец изнесувала два процента, исто како и во јуни.
САД
И фјучерсите на американските индекси се тргуваат со загуби, поради распродажба на акции од технолошки компании. Индексот Nasdaq 100 го заврши вчерашниот ден со пад од 1,4 отсто, а со минус беа и акциите на сите компании од т.н. величествена седумка. Имено, инвеститорите почнаа да ги распродаваат акциите од технолошкиот сектор, сметајќи дека нивната вредност е претерано зголемена од април наваму.
Фокусот на инвеститорите постепено се префрла и на годишниот економски симпозиум на Фед во Џексон Хоул, во сојузната држава Вајоминг, каде што в петок ќе се обрати претседателот на Федералните резерви, Џером Пауел. Трговците очекуваат дека тој тогаш ќе потврди и намалување на каматните стапки во септември.
Азија
Истовремено, акциите на берзите во азиско-пацифичкиот регион забележаа најголем пад во повеќе од две недели, при што со најголеми загуби се соочија акциите на ТСМЦ (TSMC) и на „Софтбанк“ (Softbank).
.webp){kind=icon}
