Во јуни 2008 година, еден ден пред Џефри Епстајн да почне да ја издржува казната во затворот на Флорида за изнуда на секс од малолетно лице, тој добил порака од пријател, кој бил шокиран од неправдата на целата ситуација.
„За тебе мислам сè најдобро и се чувствувам лут и безнадежен поради сè што се случи“, напишал Питер Манделсон во имејл до кој имаше увид редакцијата на „Блумберг Њуз“. „Сè уште не ми е целосно јасно. Ова едноставно не би можело да се случи во Британија.“
Во тоа време, Манделсон бил европски комесар за трговија. Денес тој е британски амбасадор во Вашингтон, што е најпрестижната позиција во британската дипломатија и само последната во низата истакнати улоги што Манделсон ги извршувал во британската влада и политика. Сега се најде во центарот на бура поради својата поврзаност со озлогласениот злоставувач, откако оваа недела беше објавена роденденска книга од 2003 година, во која Манделсон напишал десет страници пофалби за Епстајн, својот „најдобар пријател“.
Bloomberg
Bloomberg
Исечоци од роденденската книга на Епстајн, објавени од одборот на Конгресот на САД / Bloomberg
Сега „Блумберг њуз“ доби увид во повеќе од сто претходно непознати имејлови меѓу Епстајн и Манделсон, испратени во периодот помеѓу 2005 и 2010 година. Пораките покажуваат дека односите меѓу двајцата мажи биле многу подлабоки отколку што се мислело порано.
Тие односи продолжиле и долго откако однесувањето на Епстајн стана тема на насловните страници на светските медиуми, покажуваат имејловите. По првите обвиненија против Епстајн што излегоа во јавноста во 2006 година, Манделсон продолжил да му дава цврста поддршка на својот американски пријател. Долгогодишниот политичар и дипломат му давал совети на Епстајн и му предложил да се бори со стратегии од „Уметноста на војната“ на Сун Цу.
Bloomberg
Исто така, тој понудил да разговара со еден или повеќе од своите контакти за ситуацијата на Епстајн, иако не е јасно со кого точно разговарал и за што.
Во една таинствена преписка, Епстајн се повикал на претстојниот состанок меѓу адвокати и некој кого го нарекол „г-дин Биг“ и му рекол на Манделсон: „Ми треба твојот човек уште еднаш да го потсети пред состанокот… тогаш сме готови.“ Манделсон му одговорил: „Ќе добијам порака. Во моментов е на пат.“ Ни „г-дин Биг“ ни „твојот човек“ никогаш не биле именувани.
„Блумберг“ во понеделникот му испрати на Манделсон детално писмо во кое ги опишува електронските пораки. Манделсон потврдил дека ги добил прашањата, но на нив не одговорил.
Во интервју за британскиот „Сан“ во средата наутро, тој изрази жалење поради својот однос со Епстајн.
„Чувствувам неверојатно жалење, не само затоа што воопшто го запознав,“ рекол тој, „туку и затоа што продолжив со тој однос и верував во сите лаги што ми ги кажуваше мене, но и на многумина други.“
Во тоа интервју, тој нагласи дека со Епстајн имал „многу разговори и размена на пораки“ и додаде: „Знаеме дека тие ќе излезат на виделина и ќе бидат непријатни.“ Откако „Блумберг“ повторно побара коментар од Манделсон, „Сан“ објави низа исечоци од пораките со напомена дека Манделсон „не ја негирал вистинитоста на пораките“.
Манделсон пред Дауннинг стрит, 24 јануари 2001 година / Bloomberg
Во електронските пораки, Епстајн му рекол на Манделсон дека обвинителите имаат „многу лоши информации“ и дека поминал на детекторот на лаги „без никакви проблеми“. Двајцата мажи исто така разговарале за некои секојдневни теми како планови за патувања и места каде би можеле да се сретнат. Кога Манделсон напишал дека „преживува ужасна ситуација“, Епстајн го повикал, покажуваат имејловите. Манделсон му испратил книга на Епстајн, а Епстајн нему му купил камера.
Повеќето пораки се кратки и весели, но е-пораката на Манделсон од јуни 2008 година, еден ден пред Епстајн да отиде во затвор, се издвојува од овој образец. „Мораш да бидеш неверојатно цврст, да се бориш за порано ослободување и филозофски да се справуваш со работите колку што можеш. Целата оваа работа е повеќегодишна мака и сега мораш да им покажеш на луѓето колку си голема и силна личност,“ напишал Манделсон. „Твоите пријатели се со тебе и те сакаат.“
13-месечната затворска казна на Епстајн тогаш стана озлогласена. Таа беше резултат на договор помеѓу неговите адвокати и државните обвинители, при што обвинителите се откажаа од истрагата за случајот со трговија со малолетници за секс во замена за признание на вина за поослабите точки од обвинението. По овој период во затвор, Епстајн беше на слобода до 2019 година, кога беше уапсен и повторно одведен во притвор, каде и почина. Неговата смрт беше прогласена за самоубиство.
Манделсон, кој стана познат на средината на деведесеттите како архитект на проектот на новата Лабуристичка партија на поранешниот премиер Тони Блер, извршувал низа важни политички функции. Според новински исечоци од почетокот на 2000-тите, Манделсон помогнал во убедувањето на кралицата Елизабета Втора да го именува принцот Ендру, војводата од Јорк, на престижна позиција меѓународен амбасадор за трговија.
Манделсон со британскиот принц Ендру во седиштето на Европската комисија на 7 јуни 2007 година / Bloomberg
Дознаваме дека тогашните извештаи покажуваат дека војводата од Јорк и Манделсон заедно посетувале забави во Лондон и Њујорк, заедно со Гислен Мексвел, британската наследничка која поради долгогодишната лична и деловна врска со Епстајн во 2022 година била прогласена за виновна за сексуални злосторства. Не е познато кога точно Епстајн и Манделсон првпат се запознале, ниту дали токму Мексвел била таа која ги поврзала.
Првата порака во низата меѓу нив датира од октомври 2005 година. Во тоа време, Манделсон бил на функцијата европски комесар за трговија помалку од една година. Епстајн сè уште не бил обвинет за никакви злосторства. Јавно бил познат само како богат, но мистериозен финансиски донатор, длабоко поврзан со политичари, ѕвезди и елитата на Волстрит.
Е-пораките објавени во оваа статија се прикажани точно онака како што биле напишани, со сите печатни грешки и граматички неправилности.
Bloomberg
Епстајн поседувал приватен остров на Карибите. Тој одговорил дека ќе оди таму во декември и додал: „Можам да ти ги платам билетите ако треба.“ Години подоцна, „Дејли маил“ објавил фотографија која го прикажува Епстајн и Манделсон на друг карипски остров на 27 декември 2005 година. Е-пораките не наведуваат кој на крајот ги платил билетите на Манделсон.
Епстајн и Манделсон во 2006 година/ Bloomberg
Во мај 2006 година, полицијата во Палм Бич поднела пријава во која се наведува дека против Епстајн треба да се подигне обвинение со четири точки за незаконска сексуална активност со малолетно лице и една точка за развратно и похотливо злоставување. Една од наводните жртви имала само 14 години.
Подоцна истиот месец, Манделсон му испратил порака: „Што има? Во Лондон сум (празник е) и за неколку часа се враќам во Брисел. П.“
„Се обидувам да организирам уште еден состанок со обвинителите“, одговорил Епстајн.
„Следам сè внимателно и тука сум за сè што ќе ти треба,“ му одговорил Манделсон.
Месец дена подоцна, Манделсон повторно се јавил: „Ме загрижува што не сме се слушнале. Победуваш ли?“ напишал тој. Епстајн одговорил дека обвинителите сериозно погрешиле.
Bloomberg
Месец дена подоцна, истиот ден кога Епстајн бил уапсен и обвинет, Манделсон побарал новости: „Известувај ме. Каде ќе бидеш следната недела?“
„Сè е лошо, „Њујорк пост“ вели дека барав услуги на проститутка,“ одговорил Епстајн. „Њујорк пост“ на 16 август 2006 година објавил сторија под наслов: „Истражувањето откри тајна сексуална активност со тинејџерки на мистериозниот магнат.“
Додека Манделсон следел што се случува со Епстајн, тој исто така му се доверувал. Во е-пошта од октомври 2006 година, го замолил Епстајн да го повика. Објаснил дека има „ужасна ситуација“ во личниот живот.
Подоцна истиот ден, писмено му се заблагодарил за повикот: „Те молам, биди со мене додека сето ова трае. x,“ напишал Манделсон.
„Се разбира,“ одговорил Епстајн.
Состанок со „г-дин Биг“
По налог на полицијата од Палм Бич, ФБИ ја отвори истрагата против Епстајн за трговија со луѓе со цел секс. Истрагата доведе до откривање повеќе од триесет потенцијални малолетни жртви. На крајот на 2007 година, Епстајн и неговите адвокати пристапиле кон договор со канцеларијата на американскиот обвинител на Флорида.
Но, против Епстајн сè уште важеле две обвиненија на ниво на сојузната држава Флорида, а во своите пораки до Манделсон, тој изразувал желба да се бори и против нив. На почетокот на наредната година, Манделсон му кажал на Епстајн дека разговарал со неименуван контакт кој, мислел тој, би можел да помогне да се извлече Епстајн од правните проблеми.
Во порака од 7 јануари 2008 година, Манделсон напишал дека контактот му рекол: „Навистина ќе се посветам на твојот пријател, сега кога случајот е малку полесен за решавање.“
Една недела подоцна, Епстајн му рекол на Манделсон дека неименуваната личност, позната само под прекарот „г-дин Биг“, ќе се сретне со Џеј Лефковиц, еден од адвокатите на Епстајн. „Г-дин Биг го вика Лефки,“ напишал Епстајн.
Лефковиц бил висок советник во администрацијата на поранешниот американски претседател Џорџ В. Буш. Во јануари 2008 година бил официјален американски пратеник за човекови права во Северна Кореја, а истовремено работел како партнер во адвокатската фирма „Киркленд и Елис“. Не се известувало за него како за еден од главните адвокати на Епстајн сè до 2015 година.
Bloomberg
Иако во електронските пораки нема понатамошни дискусии за тоа дали состанокот навистина се одржал, Лефковиц бил во Вашингтон на 17 јануари 2008 година. Таму одржал говор за Северна Кореја. Не се знае каков бил распоредот на Лефковиц тој ден, но години подоцна потврдил дека таа вечер се сретнал со Буш во Белата куќа и дека двајцата разговарале за тој говор. Лефковиц не одговорил на повеќе прашања за коментар.
Портпаролот на претседателот Буш изјавил дека поранешниот претседател за време на својот мандат никогаш не разговарал за Епстајн. „Претседателот Буш на никаков начин не го познавал тој човек и не бил вклучен во таа приказна,“ изјавил портпаролот.
Не е јасно на кого мислел Епстајн кога рекол „твојот човек“. Во е-пораките што „Блумберг“ ги виде подоцна не се дискутира за конкретниот состанок, но Манделсон продолжил да разговара за правната борба на Епстајн.
Уште една таинствена е-порака пристигнала во јуни. Додека британскиот премиер Гордон Браун се подготвувал за состанок со Буш во Вашингтон, Епстајн му напишал на Манделсон: „Твојот тип утре се сретнува со б. Ако има прилика, би можел да го потсети Џош Болтен.“ Џош Болтен тогаш бил шеф на кабинетот на Буш.
Не е јасно од е-пораката на Епстајн за што сакал Браун „да го потсети“ Болтен. Во секој случај, Манделсон му одговорил дека тоа нема да биде можно: „Се сретнал со него утрово. Беше состанок еден-на-еден, мислам, без Џош.“ Преку портпаролката, Болтен изјавил дека „не се сеќава дека некој некогаш разговарал за случајот на Џефри Епстајн со него или, колку што е запознаен, со претседателот Буш.“
Питер Манделсон во 1998 година / Bloomberg
Подоцна тој месец, Епстајн ја признал вината и отишол во затвор. Тогаш Манделсон му напишал: „За тебе мислам сè најдобро.“
Дури и во затвор, Епстајн имал пристап до компјутер. Се сетил како Манделсон уште може да му помогне. „Дали си наишол на гувернерот Крист од Флорида, кој е во Европа поради трговски прашања,“ напишал Епстајн. „Тој ќе биде клучен за помилување затоа што ја признaв вината за злосторствата под јурисдикција на Соединетите Држави. Како си ти, кажи ми.“
Гувернерот на Флорида, Чарли Крист, поминал четири дена во Велика Британија во рамки на тие трговски прашања. Во е-пораките што ги доби „Блумберг“, немало одговор од Манделсон до Епстајн. Крист за „Блумберг“ преку телефон изјави дека не се сеќава дека разговарал со Манделсон за Епстајн и додаде дека воопшто не го знаел Манделсон. „Не,“ одговори Крист на прашањето дали некогаш разговарал за евентуално помилување на Епстајн.
Врска со „ЏП Морган“
Тоа е последната е-порака што двајцата мажи ја размениле што ја доби „Блумберг“, но неколку е-пораки објавени во друга тужба од 2023 година покажуваат дека Манделсон и Епстајн останале во контакт најмалку до 2012 година.
Во јуни 2009 година, Епстајн во порака до високо позициониран директор на „ЏП Морган“, Џес Стејли, со кој бил во честа комуникација, се пофалил со влијанието на Манделсон. Манделсон нешто порано влегол во британскиот Дом на лордовите, а како министер за економија во британската влада бил во срцето на моќта.
„Практично, Питер Манделсон сега е заменик премиер,“ напишал Епстајн. Е-поштата е објавена во рамки на тужба поднесена од обвинителите на Американските Девствени Острови. Во таа тужба, „ЏП Морган“ е обвинет за олеснување на мрежата на Епстајн за сексуална трговија. „ЏП Морган“ на крајот склопи спогодба од 75 милиони долари.
Во јануари 2010 година, Стејли побарал помош од Епстајн за организирање средби со Манделсон и со Алистер Дарлинг, тогашен британски министер за финансии, на Светскиот економски форум во Давос. Два дена по таа молба, Стејли од Давос му напишал на Епстајн: „Питер синоќа. Дарлинг за 20 минути. Повторно ќе разговарам со Питер ова утро.“
Во мај истата година, Лабуристичката партија на Манделсон изгубила на изборите во Британија и Манделсон останал без функција. Епстајн му напишал на Стејли дека „Пети заминува.“ Неколку недели по заминувањето, Манделсон му испратил на Епстајн детали за конференција во Кина подоцна таа година. „Не е ли интересно што „ЏП Морган“ има свои претставници затоа што сакаат да се прошируваат во Кина,“ напишал Манделсон. Епстајн ја препратил пораката на Стејли, согласувајќи се.
Неколку месеци подоцна, Стејли му ја препратил на Епстајн е-поштата што ја добил од Манделсон, во која се дискутира за можностите на банката во Конго. Исто така, му пратил на „ЏП Морган“ информации за руската програма за приватизација, поради што Стејли напишал на колега во Москва: „Извести ме кога Лорд Манделсон ќе може да помогне.“ Епстајн му сугерирал на Стејли дека „ЏП Морган“ треба на некој начин да соработува со Манделсон во британската канцеларија за инвестиционо банкарство „ЏП Морган казенова“, пишувајќи: „Би имало смисла Питер да има врска со 'Казенова'.“
Портпаролката на „ЏП Морган“ изјави во е-пошта: „Гледано наназад, јасно е дека помеѓу Стејли и Епстајн имало многу работи за кои не бевме известени.“ Претставниците на Стејли не одговорија на барањата за коментар.
Кон крајот на 2010 година, Манделсон основал консултантска компанија „Глобал кансел“. Во следните 14 години, нивната база на клиенти се зголемила за низа познати компании, а некои од најголемите светски фирми добиле совети за регулативата и политичките околности. Не е јасно колку долго по тоа Манделсон останал во контакт со Епстајн. Деталите од календарот на Епстајн покажуваат дека Манделсон требало да вечера со него во Њујорк во 2013 година.
Лабуристичката партија по долга пауза повторно дојде на власт, а Манделсон во февруари се врати во владата кога премиерот Кир Стармер го именуваше за амбасадор во Вашингтон. Следната недела, Манделсон требаше да присуствува на државна вечера во замокот Виндзор, каде кралот Чарлс ќе го угости американскиот претседател Трамп.
Британскиот премиер Кир Стармер и Питер Манделсон за време на прием во резиденцијата на амбасадорот во Вашингтон, февруари 2025 година / Bloomberg
Поврзаноста на Манделсон со Епстајн повторно се најде во медиумите оваа недела, откако комитетот на американскиот Конгрес објави документи за злогласниот финансиски магнат. Меѓу документите било и писмо што Манделсон му го напишал во 2003 година: „Еднаш во мојот живот слета интелигентен, остроумен човек кој го нарекуваат ‘мистериозниот’“, стои во писмото. Покрај фотографијата на Манделсон во куќна наметка во разговор со Епстајн стои: „каде и да е во светот, тој сè уште е мој најдобар пријател!“
Во средата, пратениците во Вестминстер го засипаа Стармер со прашања за Манделсон. „Амбасадорот неколкупати изрази длабоко жалење поради својот однос со него,“ изјави Стармер. „Тој има тоа право. Имам доверба во него, а тој игра важна улога во односите меѓу САД и Обединетото Кралство,“ рече британскиот премиер.
Во четврток веќе следуваше пресврт — Стармер го разреши Манделсон од местото британски амбасадор во Вашингтон.
„Со оглед на дополнителните информации во е-поштата што ја напиша Питер Манделсон, премиерот побара од министерот за надворешни работи да го повлече од местото амбасадор“, соопшти Министерството за надворешни работи.
.webp){kind=icon}
Во моментов нема коментари за веста. Биди прв да коментира...