Федералните резерви на САД (ФЕД) очекувано ги зголемија каматните стапки за 25 базични бода, во распон од 4,5 до 4,75 проценти, коментира Андреј Кнез, аналитичар во „Блумберг Адрија“, додавајќи дека со тоа дополнително се забавува процесот на монетарно затегнување, со оглед на претходното зголемување од 50 и уште порано покачувањето во повеќе наврати од 75 базични бода.
„Новост во комуникацијата на ФЕД е дека инфлаторните притисоци попуштаат, иако инфлацијата и натаму е повисока. Сигналите од ФЕД се насочени кон очекувања за дополнителен раст на каматните стапки за 50 базични бода, но дополнителното слабеење на инфлацијата сепак може да ја увери американската монетарна власт дека дополнителното зголемување од 25 базични бода е сосем доволно“, вели аналитичарот Андреј Кнез.
Тој потенцира дека пазарот на трудот во САД и натаму е многу силен и дава отпор во борбата со високата инфлација.
„И покрај обидите на ФЕД, пазарот сепак ги прифати сигналите доста позитивно, со оглед на тоа дека берзанските индекси пораснаа, а приносите на американските обврзници паднаа. Гувернерот Пауел се концентрира на движењето на цените според мерката за промена на цените на услугите за лична потрошувачка, не вклучувајќи ја тука категоријата домување, или, со други зборови, основната категорија на потрошувачки цени која се задржува на нивото од четири проценти и со тоа покажува дека борбата против инфлацијата не е готова, туку значи извесно дополнително затегнување“, објаснува Кнез.
По споменатото дополнително зголемување за 50 базични бода во март, аналитичкиот тим на „Блумберг Адрија“ очекува дека ФЕД ќе ја задржи стапката на тоа ниво до почетокот на следната година.
„Тогаш, според нас, ФЕД би требало да се осврне на монетарна релаксација. Со оглед на тоа дека и Европската централна банка се наоѓа пред уште едно затегнување, сметаме дека курсот евро/долар ќе се тргува во релативно широк распон од 1,06 до 1,11“, прогнозира аналитичкиот тим на „Блумберг Адрија“.
.webp){kind=icon}